Ballina

Autor: Kallxo

  • BE me mbi 100 vëzhgues në zgjedhje e 9 Shkurtit

    Misioni i Vëzhgimit të Zgjedhjeve të Bashkimit Evropian (EU MVZ) ka filluar punën për zgjedhjet parlamentare të Kosovës që do të mbahen më 09.02.2025.

    Gjatë një konference për media, shefja e Misionit të BE-së, Nathalie Loiseau, njoftoi se ky është misioni i shtatë i BE-së për vëzhgimin e zgjedhjeve në Kosovë. 

    Loiseau theksoi se prania e Misionit ka për qëllim të vëzhgojë dhe vlerësojë nëse procesi zgjedhor respekton ligjin e Kosovës, standardet ndërkombëtare dhe rekomandimet e mëhershme.

    Misioni, i cili është misioni i vetëm ndërkombëtar me prani afatgjatë për këto zgjedhje, do të përfshijë mbi 100 vëzhgues të shpërndarë në terren.

    “Jemi ftuar nga presidentja Osmani me BE që të vëzhgojmë zgjedhjet parlamentare të Kosovës. Kjo është hera e 7 që BE është duke vëzhguar zgjedhjet në Kosovë. Zgjedhjet parlamentare të vitit 2025 janë një zhvillim i rëndësishëm për Kosovën. Janë zgjedhjet e para që po zhvillohen në Kosovë nënë ligjin e ri për zgjedhjet dhe kam kënaqësinë të theksoj që ligji i ri për zgjedhjet ka marr parasysh një numër rekomandimesh të BE-së. Misionin i BE për vëzhgimin e zgjedhjeve dhe prani e tij në teren ka për synim të vëzhgoj dhe vlerësoj se si procesi zgjedhor e respektin ligjin për zgjedhjet në Kosovë por edhe standarde ndërkombëtare si dhe rekomandimet e më hershme që ne i kemi bërë në mënyrë që të kontribuojmë në një proces zgjedhor kredibil, gjithëpërfshirës dhe transparent. Objektivi është që votuesit të jenë në gjendje të shprehin zgjedhjet e tyre”.

    “Prania e Misionit po ashtu thekson mbështetjen e vazhdueshëm të BE për Kosovën që të fuqizoj edhe më teje qeverisjen demokratike. Ne po ashtu e paraqesim këtë rendis edhe në numra. Në momentin e zgjedhjeve do të jeni mbi 100 vëzhgues të zgjedhjeve në Kosovë që do të jenë të shpërndare në teren. Prandaj Misioni i BE-së është i vetmi mision i plotë ndërkombëtar për vëzhgimin e zgjedhjeve me prani afatgjate që do të vëzhgoj zgjedhjet parlamentare në Kosovë në këtë vit. Ekipi tashmë ka mbërritur këtu para një jave, këtë javë unë kam ardhur të mërkurën” – ka thënë ajo.

    Ajo tha se nga data 19.01.2025, 18 vëzhgues afatgjatë nga 18 shtete, përfshirë vendet anëtare të BE-së, do të shpërndahen në të gjitha komunat e Kosovës.

    Ekipet e vëzhguesve janë të kombinuara për nga aspekti kombëtar dhe gjinor.

    Shefja e Misionit nënvizoi se parimet kryesore të vëzhgimit përfshijnë pavarësinë, paanshmërinë dhe profesionalizmin.

    “Nesër në mëngjes në ora dhjet ne do  sjellim 18 vëzhgues afatgjatë dhe do të shpërndajmë ata nëpër Kosovë. Vëzhguesit afatgjatë janë nga 18 shtete të ndryshme përfshirë vendet anëtare të Bashkimit Evropian, Norvegjia dhe Zvicra. Ata do të punojnë në 9 ekipe me nga dy persona që janë të kombinuar për nga aspekti nacional dhe gjinor. Ata do të bëjnë vlerësimin e përgatitjes për zgjedhje dhe do të mbulojnë të gjitha komunat. Vëzhguesit afatgjatë janë të pavarur dhe të anshëm. Janë thelbësor për misionin e BE-së për vëzhgimin e zgjedhjeve për të zhvilluar apo bërë një vlerësim të plotë dhe gjithëpërfshirës të procesit zgjedhor. Pak para datës së zgjedhjeve misioni do të përforcohet edhe me 36 vëzhgues afatshkurtër. Një delegacion i shtat anëtarëve të parlamentit evropian dhe deri në 36 diplomatë nga shtete anëtare të BE-së, Kanada, Noverigja dhe Zvicra. Parimi themelor i misionit për vëzhgimin e zgjedhjeve të BE-së janë pavarësia, paanshmëria, konsistenca, qasja afatgjate, profesionalizmi dhe mospërzierja” – ka thënë ajo./Dukagjini

  • Shqipëria inauguron ambasadën e saj në Kiev

    Shqipëria ka inauguruar më 18.01.2025 objektin e ambasadës së saj në Kiev të Ukrainës. Kryediplomati shqiptar, Igli Hasani, tha se ky objekt nuk do të jetë vetëm një urë bashkëpunimi mes shteteve, por edhe dëshmi për qëndrueshmërinë dhe angazhimin e përbashkët drejt një të ardhmeje në paqe dhe një Evrope “të bashkuar, të fortë dhe të begatë”.

    Ambasada, e hapur në fund të vitit 2024, pësoi dëme materiale disa javë më parë si pasojë e sulmeve me raketa ruse.

    I pranishëm në ceremoninë e inaguruimit ishte edhe kryediplomati ukrainas, Andrii Sybiha.

    Gjatë vizitës së tij të parë në Kiev, Hasani u takua edhe me presidentin ukrainas, Volodymyr Zelensky. Në takim ata nënshkruan edhe një memorandum bashkëpunimi, që ka në fokus bashkëpunimin për integrimin evropian. Zyrtarët shtetërorë po ashtu këmbyen dokumentet e ratifikimit të Marrëveshjes të Miqësisë dhe Bashkëpunimit mes dy vendeve.

    “Këta hapa paraqesin përparim të madh në forcimin e raporteve mes dy shteteve tona dhe riafirmojnë përkushtimin tonë për një partneritet afatgjatë. Shqipëria qëndron me Ukrainën në rrugën e saj drejt paqes, sigurisë dhe të ardhmes evropiane”, tha kryediplomati Hasani.

    Shqipëria, vend anëtar i NATO-s, ka dënuar agresionin rus dhe ka vendosur sanksione kundër Rusisë për shkak të luftës në Ukrainë. Po ashtu, Tirana ka ofruar ndihmë tjetër, përfshirë edhe strehimin e shtetasve ukrainas.

    Të dyja shtetet, po ashtu, janë në procesin e integrimit në Bashkimin Evropian. Shqipëria veçse ka hapur kapitujt e parë të negociatave për anëtarësim./REL

  • Kush është Ahmed Al-Awda, burri që mund t’i sfidojë sundimtarët e rinj të Sirisë?

    Mediat perëndimore dhe ekspertët i janë referuar si “njeriu i Rusisë në jug” të Sirisë dhe disa e shohin atë si kërcënim potencial për sundimtarin e ri të shtetit, Ahmed al-Sharaa.

    Ai quhet Ahmed al-Awda dhe emri i tij pushtoi mediat që kur u rrëzua nga pushteti Qeveria e ish-udhëheqësit sirian, Bashar al-Assad, muajin e kaluar.

    Awda ka udhëhequr forcat rebele që kundërshtonin Assadin në Dara, në jug të Sirisë, që në vitet e para të luftës civile e cila nisi më 2011, para se të ndryshonte aleanca dhe të bashkëpunonte me aleaten e Assadit, Rusinë.

    Teksa Hayat Tahrir al-Sham (HTS) – grup i shpallur organizatë terroriste nga Shtetet e Bashkuara – dhe aleatët e tij nisën një ofensivë të shpejtë nga veriu kundër Qeverisë së Assadit më 27 nëntor 2024, Awda dhe luftëtarët e tij lëvizën drejt Damaskut nga jugu.

    “Ai është oportunist apo inteligjent dhe një lojtar pragramtik, varet nga perspektiva që e shikoni”, tha Robin Yassin-Kassab, bashkautor i librit me titullin: “Shtet në flakë: Sirianët në revolucion dhe luftë”.

    Rebel në jug

    Nuk ka detaje të qarta lidhur me fillimet e Awdas. Mediat, duke cituar njerëz të afërt me të, kanë thënë se në kohën para nisjes së luftës civile në Siri, ai u largua nga shteti dhe shkoi në Emiratet e Bashkuara Arabe, pasi përfundoi shërbimin e detyrueshëm ushtarak në ushtrinë e Sirisë.

    Awda, i cili raportohet se nuk kishte përvojë ushtarake përveç shërbimit ushtarak, u kthye në Dara më 2012.

    Më 2014, ai iu bashkua Ushtrisë së Lirë Siriane, një koalicion i gjerë i forcave rebele që kundërshtonte Assadin. Ai mori komandën e batalionit Shabaab Al-Sunna (Rinia e Sunitëve) dhe më pas mori kontrollin në vendlindjen e tij, Bosra në Dara.

    Sipas njerëzve të afërt me të, pavarësisht bashkëpunimit me ta, ai asnjëherë nuk u afrua me grupet rebele islamiste sikurse Jabhat al-Nusra apo Fronti Nusra, që u themelua nga Sharaa, i cili në atë kohë njihej me nofkën guerile, Abu Muhammad al-Jolani. Awda asnjëherë publikisht nuk ka shprehur dëshirën për një sundim sipas Ligjit të Sheriatit.

    Pas ofensivës së madhe të forcave qeveritare siriane më 2018 për të rimarrë jugun nga forcat rebele, Awda arriti të ashtuquajturën marrëveshje për zgjidhje me Rusinë.

    Sipas marrëveshjes, rebelët “u pajtuan” me Qeverinë e Assadit, dorëzuan armatimin e tyre të rëndë dhe vazhduan të qëndronin në jug.

    “Në fakt, [Awda] arriti një nivel të ulët autonomie”, tha Yassin-Kassab. “Ai u bë një komandant lokal lufte”.

    Awda më pas u bë komandant i Brigadës së 8-të, një njësit që më 2020 u integrua në Korpusin e 5-të të ushtrisë siriane, që sponsorizohej nga Rusia.

    Awda, megjithatë, ndryshoi besnikërinë edhe një herë, pas ofensivës së udhëhequr nga HTS-ja kundër Assadit nëntorin e vitit të kaluar. Thuhet se duke punuar me HTS-në, ai shkëputi lidhjet me Rusinë dhe marshoi drejt Damaskut.

    Më 8 dhjetor 2024, Awda dhe forcat e tij u panë në kryeqytetin sirian para arritjes së Sharaas, por ata u larguan brenda orësh. Përderisa ai publikisht nuk e ka shprehur dëshirën që ta sfidojë Sharaan, ka pasur raportime që lënë të kuptohet se ai dëshiron të mbajë autonominë e tij në jug.

    Kërcënim për udhëheqjen?

    Shtetet e fuqishme sikurse Egjipti, Arabia Saudite dhe Emiratet e Bashkuara Arabe janë të shqetësuara për pasojat rajonale nga marrja e pushtetit në Siri nga islamistët.

    Ky shqetësim vjen në kohën kur SHBA-ja është në proces të heqjes të disa kufizimeve, për të lehtësuar tranzicionin në epokën post-Assad. Bashkimi Evropian po ashtu po punon drejt heqjes së sanksioneve ndaj naftës, gazit, sistemit bankar dhe transportit, sipas një dokumenti jozyrtar të BE-së, të cilin e ka parë Radio Evropa e Lirë.

    Colin Clark, drejtor për politika dhe hulumtime në firmën këshillëdhënëse Soufan Group me seli në Nju Jork, tha se nëse sundimtarët e rinj të Sirisë arrijnë që në mënyrë efektive të udhëheqin me shtetin, kjo do të shërbente si “një shtytje reale” për grupet islamiste.

    “Në udhëheqjen në Emiratet e Bashkuara Arabe dhe në Arabinë Saudite ka shqetësim se marrja e Sirisë nga HTS-ja do t’i inkurajojë islamistët në këto shtete, dhe nëse [Sharaa] ia del që të qeverisë, do të ishte dëshmi e konceptit për grupet sikurse Vëllazëria Myslimane”, shtoi ai.

    Si Emiratet, ashtu edhe Arabia Saudite i shohin lëvizjet islamiste si kërcënime ekzistenciale për monarkitë dhe sisteme e tyre politike.

    Këtu, dikush si Awda – i cili njihet dhe ka lidhje me Emiratet e Bashkuara Arabe – mund të përfshihet. Disa vëzhgues rajonalë kanë sugjeruar se ai mund të bëhet Khalifa Haftar i Sirisë – një burrështetas që mbështetet nga Emiratet dhe Egjipti i cili ka sfiduar udhëheqjen e Qeverisë së Pajtimit Kombëtar të mbështetur nga Kombet e Bashkuara në Libi.

    “Jam i sigurt që Emiratet dhe [presidenti i Egjiptit, Abdel-Fattah] Sisi do të ndihmonin një kryengritje nëse dikush e nis një kryengritje në Siri”, tha Yassin-Kassab, duke shtuar se varet se sa efektive dhe sa e shpejtë do të jetë administrata e re siriane mund të vendosë rend dhe autoritet.

    “Por, nëse gjërat në përgjithësi degradohen, më pas Awda mund të bëhet një komandat lufte që do të merrte fonde nga jashtë”, tha ai./REL

  • Në Shkup vazhdojnë protestat e punonjësve të Administratës publike për rritje pagash

    Për të katërtën ditë radhazi, Sindikata e Punëtorëve të Administratës, Organeve të Drejtësisë dhe Shoqatave të Qytetarëve (AOGJSH), në Maqedoninë e Veriut vijon me protesta duke kërkuar nënshkrimin e Marrëveshjeve kolektive dhe rritjen e pagave me 30%, për nëpunësit e disa Ministrive dhe institucioneve shtetërore.

    Kryetari i Sindikatës, Trpe Deanoski, në protestën e së premtes përpara Ministrisë së Financave njoftoi se kanë dorëzuar një Kërkesë zyrtare për takim me kryeministrin e Maqedonisë së Veriut, Hristijan Mickoski.

    Ai theksoi se nëse nuk arrihet një Marrëveshje përfundimtare me Qeverinë do të fillojnë me protesta “më radikale, greva” dhe se do të shfrytëzojnë “çdo mundësi ligjore” deri në plotësimin e kërkesave të tyre.

    “Nëpunësit presin që Qeveria të tregojë mirëkuptim dhe ta pranojë këtë dorë ndihme nga Sindikata për të gjetur zgjidhje për kërkesat tona.” – tha Deanoski.

    Por, Qeveria shpreh dyshime se protestat janë të motivuara politikisht. Ajo e pranon se pagat nuk janë të larta, por arsyetohet se buxheti është i kufizuar.

    Aktualisht, paga mesatare e punonjësve në Ministrinë e Kulturës, Drejtësisë, Mjedisit, Ekonomisë dhe Punës, Transportit dhe Transformimit Digjital, si dhe Entin Shtetëror të Statistikave, është rreth 471 euro.

    Paga mesatare në nivel shtetëror në Maqedoninë e Veriut është 684 euro. Protestuesit kërkojnë një rritje prej 100 eurosh.

    “Nëse Sindikata (AOGJSH) vërtet kujdeset për pagat e punonjësve, i ftojmë për bisedime me qëllim të gjetjes së zgjidhjeve reale. Përndryshe, mbetet dyshimi se AOGJSH punon për interesa të partive të caktuara, që synojnë të fitojnë pikë politike në kurriz të qytetarëve.” – tha Qeveria në një reagim, më 15 janar.

    Por, Deanoski tha se “formalisht nuk kemi marrë ftesë për vazhdimin e dialogut” – duke nënvizuar se takimet nuk mund të zhvillohen përmes njoftimeve për media, por përmes kërkesave zyrtare për takim.

    Ai i ka bërë gjithashtu thirrje opozitës që të mos përfshihet në këto protesta – duke theksuar se këto parti kishin shtatë vjet në pushtet për ta zgjidhur problemin e pagave.

    Protestuesit akuzuan Ministrinë e Financave për Mosndërmarrjen e masave të nevojshme dhe për mosmiratimin e propozimeve të tyre.

    “Ne nuk e pranojmë diskriminimin dhe do të vazhdojmë të luftojmë për një rritje të drejtë pagash për të gjithë. Ne kërkojmë një shpërndarje të vërtetë dhe të drejtë të burimeve, që do t’u mundësojë të gjithë punëtorëve të jetojnë në mënyrë sa më dinjitoze.” – tha Zoran Gjorgjievski, anëtari i Sindikatës nga Ministria e Drejtësisë.

    Kjo është dita e katërt kur mbi 2.400 administratorë nga institucione të ndryshme publike të vendit kërkojnë rritjen e pagave.

    Ditë më parë, Sindikata raportoi se në disa Ministri kanë nisur edhe kërcënime ndaj punonjësve që të mos marrin pjesë në protestë./REL

  • Gjykimi për vrasjen më 2023 në Podujevë, dëshmitari thotë se dëgjoi fjalët e viktimës para se të vritej

    Në gjykimin ndaj të akuzuarit A. S., se në bashkëkryerje me djalin e tij të mitur kanë privuar nga jeta V. B., në marketin “Interex”, në Podujevë më 2023, në seancën më  17.01.2025, kanë dhënë dëshminë katër dëshmitarë.

    Dëshmitari Osman Shabani, i cili deklaroi se punon për një firmë tjetër, ndërsa në ditën kritike më 11.09.2023 në marketin “Interex”  kishte qenë diku rreth orës 12:00 dhe se kishte qenë te vendi i frigoriferave.

    “Unë kam qenë në punë te frizat, dhe kur ka ndodhë rasti kam qenë me shpinë ka frizat në telefon me dorë dhe i kam ni krismat, të shtënat dhe e kam kthy kryt, në anën e majtë e kam parë rastin”- tha ai.

    Tutje i njejti tha se e kishte parë edhe momentin e vrasjes të tani të ndjerit.

    “E kam parë personin tani të vrarin duke thënë ‘Pashë Zotin mo!’, këtë ia ka thënë vrasësit. Ai ka vazhdu veç me gjujtë me armë”- tha tutje dëshmitari Shabani.

    Shabani më tej deklaroi se i kishte dëgjuar se janë shkrepur 7-8 plumba, dhe pastaj pas shkrepjes së këtyre plumbave ai kishte ikur.

    Dëshmitari Shabani për të ndjerin deklaroi se e kishte njohur me nofkën “Dhija”, për emrin e tij deklaroi se nuk e kishte ditur, ndërsa për të akuzuarin A.S., deklaroi se nuk e kishte njohur më parë.

    Në këtë seancë, dëshminë e ka vazhduar edhe bashkëshortja e të ndjerit V.B., dëshmitarja Lirie Sylejmani.

    Dëshmitarja Sylejmani gjatë deklarimit të saj tha se “nuk ka asnjë fuqi që mund të ndryshojë faktin se A., (i akuzuar) e ka orintuar djalin e vet drejt neve.”

    Sylejmani tha se bashkëshorti i saj e ka njohur të akuzuarin A.S., ndërsa djalin e tij jo.

    Ndërsa e pyetur për rasportet e të ndjerit me të akuzuarin A.S., dëshmitarja tha se i ndjeri me të akuzuarin nuk ka pasur raporte me të, përveç një incidentit në vitit 2022, por që nuk ka dijeni pse ka ndodhur ai incident, përveç se ka njohuri se bashkëshorti i saj ka qenë prezent në atë incident.

    Në këtë seancë janë dëgjuar edhe Nafije Pllana dhe Ahmet Pllana.

    Dëshmitarja Nafije Pllana deklaroi se ditën kritike ka qenë duke punuar në marketin “Interex” në Podujevë  në sektorin e pemëve, ndërsa ka qenë e kthyer me shpinë në pjesën kur ka ndodhur rasti.

    Pllana tha se rastin nuk e kishte parë, vetëm se kishte dëgjuar krismën e armës dhe kishte ulur kokën dhe pastaj e kishte parë një grua të plagosur në tokë.

    Tutje dëshmitarja Pllana deklaroi se në momentin kur ka ndodhur rasti të gjithë kanë bërtitur pasi nuk e kanë ditur se çfarë ka ndodhur.

    Dëshmitari Ahmet Pllana deklaroi se diku rreth apo pas orës 12:00 kishte qenë duke punuar me bashkëshorten e tij në marketin “Interex” në Podujevë dhe diku gjatë asaj kohe ishin dëgjuar disa të shtëna.

    Pllana deklaroi se nuk i kujtohet nëse ka parë diçka përveç që kishte dëgjuar të shtënat.

    Tutje, dëshmitari Pllana tha se pas këtyre të shtënave ata ishin nisur të shkojnë në pjesën e hyrjes të marketit.

    “Ne pasi kemi shku te dera hymjes kanë pushu të shtënat. Me kolegët e tjerë dhe me bashkëshorten time Nafijen,  jemi kthyer edhe unë kur jam kthy kam pa një grua të shtrirë duke u permeqatë (në gjende të rëndë), kur e kam pa që nuk po mundet me mbajtë kokën e kam kapë një thes me fara, i kam thënë mos e qit kokën në pllaka, dhe i kam thënë mos lëviz se tash vijnë organet e rendit”- deklaroi dëshmitari Pllana lidhur me rastin.

    Pasi ishte përfundimi i orarit të punës seanca e sotme 17.01.2025 u ndërpre. Seanca e radhës për këtë çështje penale është e caktuar për në muajin shkurt 2025.

    Kjo çështje penale po udhëhiqet nga Fatime Dërmaku – kryetare dhe antarët Gent Beka dhe Sulltane Hoti.

    Çfarë thotë dosja e Prokurorisë?

    Sipas dosjes së Prokurorisë, i akuzuari A.S.  me qëllim të hakmarrjes e për shkak të një konflikti që kishte pasur më herët gjatë vitit 2022 me tani të ndjerin V.B. dhe Sh.R., i pandehuri ka porositur djalin e tij, të miturin L.S., që ta privojë nga jeta tani të ndjerin V.B., duke kontribuar thellësisht në privimin nga jeta të tani të ndjerit V.B., e duke rrezikuar edhe jetën e personave të tjerë.

    Sipas Prokurorisë, më 11.09.2023, rreth orës 11:30, i pandehuri A.S. me djalin e tij të mitur L.S. shkojnë në kafiterinë e marketit ‘Interex’ në Podujevë nga ku vëzhgojnë rrugën “Zahir Pajaziti”.

    Rreth orës 12:20, vërejnë tani të ndjerin V.B. se hyn në marketin “Interex’” së bashku me bashkëshorten e tij, tani të dëmtuarën L.S., dhe fëmijën e tyre katërvjeçar.

    Në aktakuzë thuhet se A.S. me të miturin L.S. dalin nga restoranti i marketit, duke zbritur shkallëve.

    A.S. e orienton të miturin L.S. në drejtim të të ndjerit V.B., i cili vihet në ndjekje të tij.

    Ndërkaq, A.S. vazhdon për të dalë nga objekti.

    Në momentin kur tani i ndjeri V.B., së bashku me bashkëshorten e tij, të dëmtuarën L.S. dhe fëmijën e tij, arrin te sektori i produkteve të qumështit i mituri L.S. i afrohet nga mbrapa, nga afërsia fillimisht shtie dy herë në drejtim të V.B. (e qëllon në shpinë dhe në qafë).

    Sipas dosjes, njëra nga predhat e tejshkon trupin e tani të ndjerit V.B. dhe e qëllon edhe të dëmtuarën, bashkëshorten e tij, L.S.

    Tutje, në aktakuzë thuhet se L.S. kishte filluar të ikte në momentin kur kishte dëgjuar krismën.

    I mituri L.S. kishte nxjerrë nga çanta revolen tjetër, me të cilën qëllon edhe 4 herë në kokë tani të ndjerin V.B.

    Ky i fundit, tanimë ishte i shtrirë në tokë.

    Si pasojë e këtyre të shtënave nga arma e zjarrit V.B. vdes në vendin e ngjarjes, kurse e dëmtuara L.S. dërgohet në QKUK për shkak të plagëve të rënda që pëson.

    Gjithnjë sipas aktakuzës, menjëherë pas të shtënave, i mituri L.S. me shpejtësi del nga marketi “Interexi” dhe largohet këmbë në drejtim të panjohur.

    I pandehuri A.S. afrohet te vetura e tipit “Mercedes E 200”, të cilën e kishte parkuar përballë “Interex”-it dhe shkon në shtëpinë e vet, që gjendet në fshatin Gllamnik të Podujevës, ku edhe është arrestuar nga pjesëtarët e Policisë së Kosovës.

    Gjatë bastisjes, në shtëpinë e tij janë gjetur e sekuestruar: një pistoletë dhe një pushkë gjuetie me dylbi me leje për mbajtje me 62 fishekë të pistoletës si dhe 20 fishekë të pushkës së gjuetisë e dy antiplumba.

    Me këtë i pandehuri A.S. akuzohet se në bashkëkryerje me të miturin L.S. ka kryer veprën penale – vrasje e rëndë