Ballina

Autor: Kallxo

  • Katër vjet burgim të akuzuarit për shtytje në vetëvrasje të së fejuarës

    L. Sh., i akuzuar për shtytje në vetëvrasje të B. Y., është dënuar sot me 4 vjet burgim, pasi u gjet fajtor nga Gjykata Themelore në Mitrovicë. L. Sh. akuzohet se kishte ushtruar presion psikik ndaj tashmë të ndjerës dhe se kjo e fundit ka kryer vetëvrasje pas kontaktit të drejtpërdrejtë me të akuzuarin përmes një videoje.

    Ai nga Gjykata e Mitrovicës është shpallur fajtor, sepse me veprimet e përshkruara në Dispozitiv të Aktakuzës ka kryer veprën penale: “shtytja në vetëvrasje dhe ndihma në vetëvrasje”, nga Neni 117, Paragrafi 1, i Kodit Penal të Republikës së Kosovës.

    “Gjykata konform dispozitave përkatëse të Kodit Penal, të Kodit të Procedurës Penale të njëjtin e gjykon me dënim me burgim në kohëzgjatje prej 4 vjetësh, i cili dënim do të ekzekutohet menjëherë pas plotfuqishmërisë së këtij Aktgjykimi. Të akuzuarit në dënimin e shqiptuar i llogaritet koha e kaluar në masën e paraburgimit dhe në masën e arrestit shtëpiak.” – ka thënë gjykatësja, Marigona Lajqi.

    Pas Rigjykimit, Gjykata e Themelore në Mitrovicë ka marrë parasysh Udhëzimet e Gjykatës së Apelit, sa i përket vlerësimit të disa deklaratave të dëshmitarëve dhe deklaratat e të akuzuarit të dhëna në Polici, ku i njëjti është shpallur fajtor.

    “I akuzuari është fajtor për veprën penale. Është vërtetuar nga deklaratat e dëshmitarëve F. Y., Sh. Y., B. Y., dhe B. K. – kjo e fundit shoqe e të ndjerës, ku e njëjta në shqyrtimin gjyqësor ka shpjeguar se si e ndjera kishte treguar për maltretimet që po ia bënte tani i akuzuari, e që në lidhje me këtë kishte njoftuar motrën e të ndjerës, Sh. Y., pra pas vdekjes së B. Y.” – tha gjyqtarja Lajqi.

    Lajqi potencoi se veprat për të cilat i akuzuari është akuzuar janë vërtetuar nga komunikimi në mes shoqes dhe të ndjerës.

    “Kjo është vërtetuar nga komunikimet në mes këtyre të dyjave në rrjetin social Instagram – komunikime këto që u administruan si prova në këtë gjykim. Gjithashtu, Gjykata ka vlerësuar komunikimet që ka pasur në dispozicion mes të akuzuarit dhe tani të ndjerës, ku pas një mosmarrëveshje që kishin pasur e ndjera i drejtohet të akuzuarit se do t’i tregonte babit lidhur me veprimet e tij, ndërsa i akuzuari përgjigjet ‘Veç guxo, veç guxo’. E, pastaj plason me sharje dhe ofendime të rënda në drejtim të të ndjerës. Ndërsa, kur është pyetur në lidhje me këto komunikime, i akuzuari në deklaratën e tij në Polici pranon se ka kanosur të ndjerën edhe më herët dhe thotë se nuk ka qenë diçka serioze pasi këtë e ka bërë me qëllimin që të mos bëhet e madhe te familjarët.” – tha Lajqi.

    Tutje, në Vendim thuhet se “vetë i akuzuari ka deklaruar se e ndjera B. Y. edhe më herët kishte shfaqur shqetësime se është duke e menduar vetëvrasjen. Për këtë Gjykata të akuzuarin e bën përgjegjës, pasi që ka qenë në dijeni për gjendjen jostabile të së ndjerës dhe përkundër kësaj, pra, ka ushtruar presion ndaj saj. Deri kur e njëjta ka ardhur në atë gjendje, sa të kryejë vetëvrasje”.

    “Këto prova, rrethana në lidhje me rrethanat e tjera të përmendura më sipër nuk kanë ndonjë interpretim tjetër, se e ndjera B. Y., aktin e vetëvrasjes e ka kryer duke qenë pra e shtyrë nga i akuzuari”.

    Me dënimin prej 4 vjetësh për të akuzuarin L. Sh., avokati i familjes së të ndjerës, Shyqyri Syla për KALLXO.com ka thënë që e konsideron si një Vendim të drejtë.

    “Konsideroj që Vendimi i marrë sot që është shpallur fajtor personi, që ka shtyrë në vetëvrasje tashmë të ndjerën është i drejtë. Më në fund, ai është shpallur përgjegjës dhe sigurisht që familja do të ndjejnë veten më të qetë. Dhe, konsiderojmë që Vendimi i parë ka qenë i padrejtë.” – është shprehur për KALLXO.com, avokati Shyqyri Syla.

    Aktivisti i shoqërisë civile në Mitrovicë, Mehmet Salihu në një prononcim për KALLXO.com ka thënë se edhe pse është Vendim i vonuar, është i qëlluar.

    “Vendimi i Gjykatës përtej kësaj është shumë i vonuar, por i qëlluar. Kemi lobuar e jemi munduar që në fakt sa më shpejt me u marrë ky Vendim. Jemi munduar që të bëjmë më të mirën për këtë rast dhe në fund mundem me thanë që triumfoi drejtësia.” – ka thënë aktivisti Mehmet Salihu.

    Por për këto akuza, më 16.10.2023, Gjykata e Mitrovicës kishte liruar nga akuza të pandehurin L. Sh., se nuk kishte ekzistuar dyshim i bazuar se në atë periudhë kohore nga data 30.12.2021 deri më datën 08.09.2022, në një fshat të Mitrovicës, me sjelljet dhe veprimet e tij ka nxitur persona të tjerë për të kryer vetëvrasje, gjegjësisht të fejuarën e tij.

  • Prokuroria e Gjakovës kërkon paraburgim për tre inspektorët e arrestuar të ATK-së

    Prokuroria Themelore në Gjakovë ka kërkuar masën e paraburgimit prej një muaji, ndaj tre inspektorëve të Administratës Tatimore të Kosovës (ATK), të cilët u arrestuan për marrje ryshfeti.

    Këtë për KALLXO.COM e ka konfirmuar zyrtari për Komunikim publik i Prokurorisë Themelore në Gjakovë, Drini Domi.

    I njëjti konfirmoi se seanca dëgjimore pritet të mbahet gjatë së martës, më 21.01.2025, në Gjykatën Themelore në Gjakovë.

    KALLXO.com ka raportuar, më 20.01.2025, lidhur me aksionin që rezultoi me tre persona të arrestuar – nën dyshime për marrje ryshfeti.

    Sipas Prokurorisë, pas pranimit të informatës, ndaj të dyshuarve janë ndërmarrë edhe masat e fshehta hetimore.

    “Lidhur me rastin në fjalë, ju njoftojmë se Prokuroria Themelore – Gjakovë, pas pranimit  të informatës se 3 (tre) të dyshuarit, në periudha të ndryshme kohore dhe në lokacione të ndryshme në Gjakovë, kishin kërkuar dhe pranuar ryshfet nga pronarë të ndryshëm të bizneseve, ku me këto veprime dyshohet se kanë kryer veprën penale ‘marrja e ryshfetit’, Neni 421 i KPRK-së, ka ndërmarrë veprime hetimore – duke zbatuar edhe masa të fshehta hetimore, ndaj të njëjtëve.” – thuhet në njoftimin e Prokurorisë së Gjakovës.

    Kurse, me urdhëresë të Gjykatës Themelore të Gjakovës janë kryer edhe bastisje në disa lokacione.

    “Ndërsa, më 20.01.2025, me urdhëresë të Gjykatës Themelore – Gjakovë, është kryer bastisje në 3 (tri) lokacione të ndryshme dhe, me vendim  të Prokurorit të Shtetit, janë ndaluar 3 (tre) persona, në kohëzgjatje prej 48-orësh, për shkak të veprës penale ‘marrja e ryshfetit’, Neni 421 i KPRK-së.” – thuhet, tutje, në njoftimin e Prokurorisë.

  • Banorët e Koshtovës së Bobit në Mitrovicë kërkojnë rregullimin e shtratit të lumit – VIDEO

    Shtrati i lumit i parregulluar që kalon në afërsi të 25 shtëpive në fshatin Koshtovë e Bobit në Komunën e Mitrovicës së Jugut po krijon vështirësi dhe rrezik për jetesën e banorëve.

    Banorët e lagjeve “Binaku” dhe “Latifi” thonë se edhe pas 11 vjetëve që ishin munduar për të rregulluar këtë – siç e quajnë kanal – nuk kanë marrë asnjë ndihmesë.

    “Problemi është se që 11 vjet kemi participuar dy lagjet. Kemi qenë në Komunë, por asnjë përgjigje nuk kemi. Po, po…, jo nuk thonë kurrë. Punë nuk kryejnë kurrë. Kështu kemi mbetur në mëshirë të fatit.” – ka thënë për KALLXO.com banori i fshatit, Sherif Latifi.

    Latifi ka shtuar se “nuk e di, nëse nuk ndërmerret diçka këtu, ne veç do të largohemi krejt dhe do të shpërngulemi prej këtu”.

    “Te Granit Tmava (Drejtori Komunal) jena kanë për qit rekë (lumë), por na ka thënë që duhet të shkojmë në Emergjencë. Kemi shkuar në Emergjencë, ku na thanë që nuk kemi buxhet për këto dhe kemi mbetur kështu.” – pohoi Latifi.

    Një tjetër banor, Sheshivar Brahimi ka thënë për KALLXO.com, se është i gatshëm të marrë “hapa ekstremë”, nëse nuk do të ketë ndonjë ndërhyrje nga autoritetet lokale.

    “Unë jam Sheshivar Brahimi dhe do të dal tek Ura. Do të lajmëroj Komunën për datën kur dhe do të bllokoj rrugën. Unë do të jem iniciator për rrugën. Jam plakë, le të më çojnë ku duan. Nuk ka lidhje. Jo, jo, paguaj rrymën, paguaj ujin, paguaj bërllogun, çka na, ku jetojmë ne!?” – tha Brahimi.

    Sipas banorëve ata kishin kontribuar me afro 5 mijë euro për rregullimin e këtij kanali, para 11 vjetëve.

    “Në qeverisjen e Avni Kastratit kemi kontribuar, saktësisht nuk e di, dikund rreth 5 mijë euro. Kanë filluar të rregullojnë dhe pastaj e kanë ndërprerë. Na thanë se deri këtu kemi.” – ka përfunduar Latifi.

    Se çfarë kërkojnë nga aktorët komunalë, na tregon banori Sheshivar Brahimi, ku thotë se duhet të rregullohet ndonjë mur apo rindërtimi i kanalit.

    “Që aty 1 metër e 20 është ku është rregulluar. Aty pa u bërë një mur, nëse lejohet, ose të bëhet kanalizim, është edhe më mirë. Por, nëse nuk bëhet kanalizimi, le të bëhet si në Vaganicë që u bë kështu, sepse deri atje përtej pemëve është i shtetit, nuk është i komshinjës, por është i shtetit.” – potencoi Brahimi.

    KALLXO.com ka kontaktuar edhe me Drejtorinë për Shërbime Publike dhe Infrastrukturë në Mitrovicën e Jugut, por deri në publikimin e këtij artikulli nuk ka marrë përgjigje.

  • Rubio zgjidhet unanimisht Sekretar amerikan i Shtetit

    Senati Amerikan e ka miratuar unanimisht Marco Rubion si Sekretar të Shtetit – duke e vendosur senatorin në vijën e parë të diplomacisë së presidentit të ri, Donald Trump.

    Rubio, i cili është hispaniku i parë dhe folësi i parë i rrjedhshëm i gjuhës spanjolle që merr detyrën e Kryediplomatit amerikan, është Kandidati i parë i Kabinetit të Trump që u konfirmua nga Senati i drejtuar nga Republikanët – vetëm disa orë pas inaugurimit.

    Presidentja e Kosovës, Vjosa Osmani i uroi Rubios suksese pas emërimit të tij në postin e Sekretarit të Shtetit, në atë që Osmani e quajti rol të rëndësishëm.

    “Kosova mezi pret të punojë me ju për të forcuar aleancën tonë të qëndrueshme, për të promovuar vlerat tona të përbashkëta dhe për të adresuar sfidat e kohës sonë së bashku.” – shkroi Osmani në X.

    Përgjatë karrierës, Rubio e ka pasur disa herë në fokus rajonin e Ballkanit. Në vitin 2022, ai iu bashkua një grupi senatorësh, i cili i dërgoi letër presidentit të atëhershëm amerikan, Joe Biden, për ta inkurajuar që ta mbajë Ballkanin në vëmendjen e tij.

    “Ballkani është një zonë e cenueshme e Evropës dhe megjithëse Ukraina duhet ta ketë vëmendjen tonë të menjëhershme, ne nuk mund ta humbasim nga sytë këtë rajon, ku NATO-ja, prej kohësh, ka luajtur një rol të rëndësishëm në ruajtjen e paqes.” – u tha në atë letër.

    Rubio u konfirmua në këtë post me 99 vota pro dhe asnjë kundër, me disa senatorë nga Partia Demokratike rivale që e përshkruan Rubion si një mik. Një vend në Senat kishte mbetur bosh pas inaugurimit të nënpresidentit, J.D. Vance.

    “Duke marrë parasysh pasigurinë në mbarë botën tani, është në interes të Amerikës të mos humbasë kohë.” – tha senatorja Jeanne Shaheen, demokratja kryesore në Komitetin e Marrëdhënieve me Jashtë të Senatit.

    “Ndërsa mund të mos biem gjithmonë dakord, unë besoj se ai ka aftësitë, njohuritë dhe kualifikimet për të qenë Sekretar i Shtetit.” – tha ajo në Sallën e Senatit.

    Shaheen dhe kryetari republikan i komitetit, Jim Risch ranë dakord ta përshpejtojnë emërimin e Rubios, i cili u miratua nga Paneli – vetëm një orë para se të kalonte në Sallën e Senatit.

    “Nuk është sekret që fuqitë armiqësore nga Kina te Rusia, nga Koreja e Veriut te Irani, kanë formuar një bosht autoritar që synon të dobësojë Shtetet e Bashkuara.” – tha Risch.

    “Na duhet një Kryediplomat parimor dhe i përqendruar te veprimi si Marco Rubio, për t’i përballuar ata”.

    Rubio do të ketë menjëherë detyrën për të zbatuar politikën e jashtme potencialisht të paparashikueshme të Trumpit, i cili në një fjalim inaugurues të hënën përsëriti kërcënimet për të marrë Kanalin e Panamasë, por gjithashtu premtoi të ishte një “paqebërës”.

    Trump sfidoi dy Sekretarët e Shtetit gjatë mandatit të tij të parë, me një politikë të jashtme që ndryshonte shpejt – duke kaluar në një rast nga kërcënimi për shkatërrimin e Koresë së Veriut në deklaratën se ai “ra në dashuri” me liderin autoritar Kim Jong Un.

    Rubio, djali i një familjeje punëtore kubane që kundërshtoi ashpër Revolucionin komunist të Fidel Castros, është i njohur për qëndrimin e tij të ashpër ndaj shteteve autoritare të Amerikës Latine dhe Kinës.

    Në seancën e tij të konfirmimit javën e kaluar, Rubio akuzoi Kinën për mashtrim në rrugën e saj drejt statusit të superfuqisë dhe e quajti gjigantin aziatik “kundërshtari më i fuqishëm dhe më i rrezikshëm që ky komb ka hasur ndonjëherë”.

    Disa nga të nominuarit e Trumpit nuk kanë pasur ende seanca konfirmimi, për shkak të historikut të tyre të diskutueshëm – përfshirë Tulsi Gabbardin për postin e shefes së inteligjencës, Robert F. Kennedy Jr. për Sekretar të Shëndetësisë dhe Shërbimeve humane dhe Kash Patel për FBI-në./REL

  • Moti për sot

    Instituti Hidrometeorologjik i Kosovës ka njoftuar se sot, më 21.01.2025, moti do të jetë kryesisht i vranët.

    Sipas njoftimit, temperaturat minimale do të lëvizin ndërmjet -5°C dhe -2°C, ndërsa ato maksimale do të variojnë nga 2°C deri në 6°C.

    Era do të jetë e lehtë nga drejtimi i verilindjes.