Ballina

Autor: Ilirjana Hoti

  • Policia parandalon kontrabandë me mallra në brezin kufitar Kosovë-Serbi

    Policia e Kosovës ka bërë të ditur se është parandaluar një rast i kontrabandës me mallra, në kufi me Serbinë.

    Sipas njoftimit, në bashkëpunim me Doganën e Kosovës, më 29.01.2025, në magjistralen Kamenicë-Gjilan, Njësitet kanë ndaluar një automjet për kontrollim.

    “Më 29.01.2025, Njësitet e lartcekura pas pranimit të informatave dhe dyshimeve për kontrabandë të mallrave nga Serbia, përmes rrugëve ilegale, jashtë pikave kufitare të rregullta, në magjistralen Kamenicë-Gjilan kanë ndaluar një automjet për kontrollim.” – thuhet në njoftim.

    Policia njofton se pas ndalimit të automjetit të dyshuar me targa serbe, të cilin po e drejtonte i dyshuari me nënshtetësi serbe, gjatë kontrollit janë gjetur 700 pako cigare me banderola të Serbisë.

  • Çfarë dihet për përplasjen e aeroplanit në Uashington?

    Një aeroplan pasagjerësh me 64 persona në të është përplasur me një helikopter ushtarak dhe për pasojë ka rënë në një lumë në Uashington.

    Ka raportime se të paktën 18 trupa janë nxjerrë prej lumit Potomak.

    Temperaturat është raportuar të jenë tejet të ulëta dhe e gjithë situata po vështirëson përpjekjet për kërkim-shpëtim.

    Autoritetet amerikane janë duke hetuar rastin, ndërsa Aeroporti Kombëtar i Uashingtonit, Ronald Reagan i ka ndalur të gjitha fluturimet.

    Çfarë ndodhi?

    Rreth orës 21:00 të së mërkurës, sipas kohës lokale, një aeroplan i Kompanisë “PSA Airlines” – duke operuar si “American Airlines 5432” – është përplasur me një helikopter të Ushtrisë amerikane, teksa i është afruar Aeroportit “Ronald Reagan” – sipas Administratës Federale të Aviacionit.

    Aeroplani i pasagjerëve, i llojit “Bombardier CRJ700”, është nisur nga Kansasi.

    Në të kanë qenë 60 pasagjerë dhe katër anëtarë të bordit – sipas “American Airlines”.

    Pentagoni ka thënë se helikopteri ka qenë i tipit “Sikorsky H-60”, i cili ishte nisur nga Virxhinia. Tre ushtarë kanë qenë në bord – sipas rrjetit televiziv CBS.

    Administrata Federale e Aviacionit ka thënë se do ta hetojë incidentin, bashkë me Bordin Kombëtar për Siguri të Transportit.

    A ka viktima?

    Nuk ka raportime zyrtare për viktima. Në raportimet fillestare në mediat amerikane është thënë se aeroplani i pasagjerëve është ndarë në dysh në lumin Potomak, ndërsa helikopteri është përmbysur në ujë.

    Policia dhe Departamenti i zjarrfikësve janë duke kërkuar në lumë për të mbijetuarit.

    Përpjekjet për kërkim-shpëtim mund të shihen nga Aeroporti “Ronald Reagan”, që është afër lumit.

    Çfarë kanë thënë dëshmitarët?

    Ari Schulman ka thënë për NBC Washington se e ka parë përplasjen e aeroplanit, teksa ka qenë duke vozitur me makinë në afërsi të Aeroportit.

    Ai ka thënë se ulja e aeroplanit është dukur normale, derisa ka parë një dritë të madhe në qiell, si pasojë e përplasjes.

    Deklarimet e zyrtarëve

    Presidenti amerikan, Donald Trump ka thënë se është informuar plotësisht për “aksidentin e tmerrshëm” dhe që është duke vëzhguar situatën nga afër.

    “Zoti i bekoftë shpirtrat e tyre.” – ka thënë ai përmes një deklarate.

    Trump i ka falënderuar ekipet e kërkim-shpëtimit për punën e bërë.

    Nënpresidenti J.D Vance ka bërë thirrje për t’u lutur për ata të cilët janë përfshirë në incident.

    Sekretari i Mbrojtjes, Pete Hegseth dhe Sekretari i Transportit, Sean Duffy, të cilët sapo janë emëruar në pozitat e tyre kanë thënë se janë duke monitoruar situatën.

    Shefi i Kompanisë “American Airlines”, Robert Isom ka shprehur “dhimbje të thellë” për përplasjen.

    Presidentja e Kosovës, Vjosa Osmani ka thënë se është thellësisht e mërzitur për rrëzimin e aeroplanit dhe ka ngushëlluar familjarët që mund të kenë humbur dikë të afërt si pasojë e incidentit.

    “Kosova është me ju në këtë periudhë zemërthyese.” – ka thënë ajo përmes një postimi në X – platformë e njohur më parë si Twitter.

    Kampionët rusë të patinazhit Naumov dhe Shishkova raportohet se ishin në mesin e pasagjerëve

    Ish-kampionët botërorë rusë të patinazhit, Vadim Naumov dhe gruaja e tij, Evgenia Shishkova raportohet të jenë në mesin e viktimave, si pasojë e rrëzimit të aeroplanit.

    Agjencia shtetërore e lajmeve në Rusi TASS dhe uebfaqja ruse e sportit Sports.ru kanë cituar burimet e tyre të kenë thënë se Naumov dhe Shishkova të cilët kanë fituar medalje të arta në Kampionatin Botëror më 1994 kanë qenë në aeroplan.

    Çifti është shpërngulur në Shtetet e Bashkuara pasi kanë përfunduar karrierën dhe janë bërë trajnerë në fushën e patinazhit.

    Djali i tyre 23-vjeçar, Maximi është shtetas amerikan i cili garon për Shtetet e Bashkuara në gara ndërkombëtare.

    Ai është shpallur Kampion Kombëtar i Të Rinjve, më 2020.

    Shtetet e Bashkuara nuk kanë regjistruar ndonjë aksident me aeroplanë pasagjerësh, qysh prej shkurtit të vitit 2009, ndonëse një mori incidentesh në vjetët e fundit kanë rritur shqetësimet për sigurinë./ REL

  • Informacioni i rremë se ‘është dënuar Granit Plava’, ai ende është në gjykim

    Rreth një javë pasi ishte ngritur aktakuza ndaj të dyshuarve për vrasjen e Liridona Ademajt, Naim Murselit, Granit Plavës, Kushtrim Kokallës dhe Tomë Dodajt, në rrjetin social Tiktok  (arkiva) qarkulloi një video me mbishkrimin “Flet i denuari qe e beri vrasjen e Liridones qe kishte paguar Naim Murseli per vrasjen e gruas”.

    Informacioni se Granit Plava është “i dënuar” në lidhje me këtë rast, është i pasaktë, pasi Plava ende nuk është shpallur fajtor dhe nuk është dënuar nga Gjykata për vrasjen e Ademajt.

    Më 27.01.2025 ishte caktuar data e nisjes së gjykimit ndaj të akuzuarve. Kjo konsiderohej seanca e parë për këtë gjykim, në të cilin parashihej që të bëhej leximi i aktakuzës dhe deklarimi se a ndjehen apo jo fajtor të akuzuarit për veprat që rëndojnë mbi ta.

    Mirëpo, për shkak të mungesës së shkresave të lëndës për palët e akuzuara, është shtyrë seanca e shqyrtimit fillestar. Seanca e radhës për këtë rast është caktuar për datën 31.01.2025.

    Prokuroria Themelore e Prishtinës ka ngritur aktakuzë më 15.01.2025, ndaj katër personave që dyshohen se lidhen me vrasjen e Liridona Ademajt.

    Çka thotë aktakuza për vrasjen e Liridona Ademajt?

    Naim Murseli, Granit Plava, Kushtrim Kokalla e Tom Dodaj janë katër persona, të cilët tashmë po akuzohen nga Prokuroria Themelore në Prishtinë, nën dyshimin për organizimin dhe vrasjen e Liridona Ademajt – incident ky që u regjistrua më 29.11.2023, në fshatin Bërnicë të Prishtinës.

    KALLXO.com ka arritur që të sigurojë Aktakuzën e plotë të ngritur nga prokurorja, Javorka Prlinçeviq. Kjo e fundit në një Konferencë që u thirr nga kryeprokurori Zejnullah Gashi, tha se vonesa e Aktakuzës është si shkak i disa dokumenteve dhe kërkesave që ka kërkuar nga Suedia, për të zbardhur motivin që  çoi në vrasjen e Liridona Ademajt.

    Prokurorja e rastit ka përshkruar se Naim Murseli planifikoi vrasjen e bashkëshortes së tij për shkak të raporteve të çrregulluara familjare dhe martesore. Prej këtyre problemeve – siç përshkruhet edhe në Aktakuzë – kishte lindur edhe dëshira për hakmarrje nga ana e Naim Murselit ndaj bashkëshortes së tij.

    Gjithmonë sipas Aktakuzës, pas datës 25.06.2022, kur ishte paguar një polisë e sigurimit jetësor në emër të Liridona Ademajt në vlerë prej 3 milionë kruna suedeze, me qëllim që pas vrasjes Murseli të përfitonte dobi financiare.

    Këtë plan Dosja e përshkruan se Naim Murseli e ndau me djalin e tezës së tij Kushtrim Kokallën dhe se ky i fundit kishte refuzuar që të kryente vrasjen, por tutje ka gjetur personin e tretë, Granit Plavën me të cilin e ka njoftuar Naim Murselin.

    Sipas Dosjes, më 29.11.2023, në orët e mesditës, Naim Murseli bashkë me Granit Plavën blejnë një armë të tipit ‘Zastava” me ngjyrë të zezë, nga Tom Dodaj, në vlerë 280 euro.

    Në të njëjtën ditë, Dosja shpjegon se në intervalin kohor: 20:11-20:18 minuta, në vendin me të cilin paraprakisht ishte dakorduar Naim Murseli me Granit Plavën – plan të dakorduar të cilin e kanë inskenuar që të dukej si grabitje e armatosur – është kryer edhe vrasja.

    Në Dosje shkruhet se Naim Murseli e kishte lajmëruar fillimisht Granit Plavën me drita të veturës, më pas e kishte kapur për dore Liridona Ademajn, që të mos i shpëtojë plumbit, pasi u shkrep nga Plava. E, që tutje Naimi ka dalë nga vetura me fëmijët dhe është larguar nga vendi i ngjarjes. Me të gjitha këto veprime që ka kryer Naim Murseli, Prokuroria e ka ngarkuar atë me veprën penale të “vrasjes së rëndë”.

    I pandehuri i dytë Granit Plava, sipas Prokurorisë në ditën kritike në intervalin kohor: 20:11-20:18 minuta, në fshatin Bërnicë, pas marrëveshjes paraprake që kishte bërë me Naim Muselin, akuzohet se kreu vrasjen në formë të maskuar, kishte shtënë në drejtim të viktimës, e cila për pasojë edhe ka vdekur. E për të gjithë këtë rast, Plava do të kompensohej me një shumë prej 30 mijë euro.

    Sipas Dosjes së Prokurorisë, Plava ishte afruar drejtpërdrejt me viktimën dhe të njëjtën e ka qëlluar me armë, derisa krahun viktimës po ia mbante ish-bashkëshorti i saj, që të mos i shmangej plumbit.

    Arma që ishte përdorur në rast ishte gjetur në shtëpinë e tashmë të akuzuarit  Granit Plava, në fshatin Cermjan të Gjakovës. Sekuestrimi i armës u bë pas bastisjes, që u krye në shtëpinë e të dyshuarit.

    Plava nga Prokuroria ngarkohet me veprat penale “vrasje e rëndë” dhe “posedim i armës pa leje”.

    I akuzuari i tretë është Kushtrim Kokalla, djali i tezës së Naim Murselit. Dosja tregon se Kokalla kishte refuzuar të kryente vrasjen, por që më pas kishte gjetur Granit Plavën dhe i kishte prezantuar Naim Murselit.

    Edhe Kokalla ngarkohet me veprën penale të vrasjes së rëndë. E i pandehuri i katërt në këtë rast është Tom Dodaj. Ai po ngarkohet për “furnizim me armë” të tre të dyshuarve të parë, të cilët planifikuan vrasjen.

  • Vdes gazetarja ukrainase Olga Priadko, e cila po strehohej në Kosovë

    Ka vdekur në moshën 51-vjeçare, gazetarja nga Ukraina, Olga Pridako e cila po qëndronte në Kosovë në kuadër të programit “Gazetarët në Rezidencë – Kosova”.

    Sipas një komunikate për media nga Asociaiconi i Gazetarëve të Kosovës, Pridako ka vdekur në banesën e saj në Prishtinë, ku jetonte për më shumë se dy vjet me djalin e saj.

    “Me dhimbje të thellë, Asociacioni i Gazetarëve të Kosovës njofton vdekjen e gazetares ukrainase, Olga Priadko, në moshën 51-vjeçare. Ajo ishte pjesë e programit “Gazetarët në Rezidencë – Kosova”. Zonja Priadko ka vdekur në banesën e saj në Prishtinë, ku jetonte për më shumë se 2 vjet me djalin e saj, Yaroslavin.” – thuhet në komunikatë.

    “AGK dhe Qendra Evropiane për Lirinë e Shtypit dhe Medias (ECPMF) shprehin ngushëllimet e tyre më të thella për familjen dhe miqtë e gazetares Priadko. Përkushtimi i saj në gazetari do të kujtohet dhe nderohet nga të gjithë ata të cilët punuan me të.” – thekson AGK-ja.

    Që nga nisja e pushtimit rus në Ukrainë, Kosova ka ofruar strehim dhe mundësi për punë nga distanca, për rreth 20 gazetarë ukrainas.

    Lufta në Ukrainë ka nisur më 24.02.2022.

    Presidenti rus, Vladimir Putin e quan luftën “operacion special ushtarak”, për të çmilitarizuar Ukrainën.

    Perëndimi është përgjigjur ndaj Rusisë – duke goditur ekonominë e këtij shteti me sanksione të ashpra.

    Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre.

  • Gjuha e Kurtit ndaj LDK-së në tubimin në Pejë – PZAP-ja gjobit Vetëvendosjen

    Paneli Zgjedhor për Ankesa dhe Parashtresa (PZAP) ka dënuar me 3 mijë euro gjobë Lëvizjen Vetëvendosje, për shkak të shkeljes së Kodit për Mirësjellje për Subjektet Politike, Mbështetësit e tyre dhe Kandidatët.

    Sipas PZAP-së, kryetari i LVV-së dhe njëherësh kryeministër i Kosovës, Albin Kurti ka përdorur gjuhë fyese për LDK-në, gjatë një tubimi të organizuar më 13.01.2025.

    “Nuk ka sesi të mos çuditemi kur dëgjojmë nga udhëheqja e LDK-së se Policia e Kosovës, Kryeministri i Republikës, institucionet e shtetit tonë na qenkan si Serbia e Millosheviqit (krahasim i tmerrshëm, fyerje e shpifje klasike, vrer e mllef i papërmbajtshëm, e pavërtetë e madhe dhe tentim nxitjeje për rënie në grackën e tij provokuese).” – thuhet në Ankesën e LDK-së, të parashtruar në PZAP.

    PZAP-ja ka pranuar pjesërisht Ankesën duke konstatuar se Kurti ka përdorur gjuhë fyese, pasi gjatë tubimit u shpreh se “’Siç e dini edhe ju vetë, LËDËKYHI (term pezhorativ) dhe PËDËKYHI janë në koalicion.’ – Parashtruesi i Ankesës i citon thëniet në vazhdim: Prandaj, kur na rastis të dëgjojmë ndonjë udhëheqës të LËDËKYHIT, që thotë se po i pëlqen populli, populli ka simpati për ta, kjo mu (flet për veten Kurti) m’i përngjan asaj mizës (krahasim fyes, bullizues, nxitës e provokues), që thoshte kudo që po shkoj po më presin me duartrokitje (ironizon me gjestikulacion dhe shprehje të çuditshme dhe të pakontrolluara të fytyrës)’”.

    Tutje, sipas PZAP-së, parashtruesi i Ankesës thekson se “pra, kur ata thojnë që populli po i pëlqen ata është si ajo miza që lëvdohej që njerëzit po e presin me duartrokitje. E, ju e dini shumë mirë që me ato duar që duartrokasin çfarë janë duke provuar t’i bëjnë asaj mize (aludon në një krahasim të rëndë që tejkalon metaforën e kthehet në gjuhë provokuese të urrejtjes ndaj tjetrit – në këtë rast ndaj udhëheqësit të LDK-së)”.

    LVV-ja e ka kundërshtuar Ankesën e LDK-së, pasi sipas tyre përshkrimi në fakt kinse i fjalëve të Albin Kurtit në Ankesë nuk qëndron.

    Partia e Kurtit ka afat prej 15 ditësh, që ta paguajë gjobën.

    Vendimin e plotë të PZAP-së mund ta shihni në këtë vegëz.