Ballina

Autor: Florinda Kelmendi

  • Suspendohet tre punëtorë të Trepçës, ikën nga puna duke i shfrytëzuar daljet alternative

    Ndërmarrja “Trepça” ka njoftuar se ka shqiptuar masa disiplinore ndaj tre punëtorëve, sot më 16.01.2025.

    Përmes njoftimit të ndërmarrjes, thuhet se për këta tre punëtorë është shqiptuar masë disiplinore me largim të përkohshëm nga puna.

    “Më datën 16.01.2025 ndaj M. S., B. SH., E. K., me vendim të u.d. Kryeshefit Ekzekutiv të Trepça Sh.A. me nr.prot:401 dhe me nr.prot:402 është shqiptuar masa disiplinore largim i përkohshëm nga puna”- thuhet në njoftimin e Ndërmarrjes “Trepça”.

    Tutje, në njoftim thuhet se të njëjtit kanë keqpërdorur kartelën indetifikuese dhe duke shfrytëzuar daljet alternative.

    “M. S., më datën 10.01.2025 në ora 06:30 është skenuar përmes kartelës dhe ka dalur nga rrethoja afër portës nr.1, ashtu që ka kryer shkelje të detyrave të punës sipas rregullores për përgjegjësinë disiplinore dhe materiale të punëtorëve të Trepça Sh.A. Gjithashtu B. SH., E. K., më datën 07.01.2025 kanë ikur nga vendi i punës dhe kanë shfrytëzuar daljet alternative për të ikur nga vendi i punës, ashtu që kanë kryer shkelje të detyrave të punës  sipas rregullores për përgjegjësine disiplinore dhe materiale të punëtorëve të Trepça Sh.A.”- thuhet në njoftim.

  • Inspektorati Policor rekomandon shtimin e policëve në Veri në Njësinë e Trafikut Rrugor

    Inspektorati Policor i Kosovës ka rekomanduar shtimin e policëve në Drejtorinë Rajonale Mitrovicë – Veri, përkatësisht në Njësinë e Trafikut.

    “IPK i rekomandon Drejtorit të Drejtorisë së Personelit, që në bashkëpunim me Drejtorinë Rajonale Policore – Mitrovicë Veriu, të sigurojnë personel të mjaftueshëm për të përmbushur strukturën dhe kapacitetet e Njësisë Rajonale të Trafikut Rrugor – Mitrovicë Veriu.” – thuhet në Raportin e Inspektimit të IPK-së.

    Lista e Personelit të Autorizuar (LPA) ka bërë të ditur se në Mitrovicë të Veriut janë tre rreshterë dhe 30 policë në Ekipe patrulluese, ndërsa në Ekipin e hetimeve janë vetëm tre policë e nuk ka rreshter fare.

    “Nëse e përcjellim individualisht gjendjen sasiore me burime brenda secilës Njësi, pasqyrohet se Njësia e Trafikut Rrugor në Mitrovicë të Veriut ka tre rreshterë – 21 policë më pak krahasuar me Listën e Personelit të Autorizuar. Njësia e Trafikut Rrugor në Mitrovicë – Pejë në Ekipe patrulluese ka pesë policë më shumë.” – thuhet në njoftimin e IPK-së.

    IPK njofton se janë kontrolluar 658 mostra të ngjarjeve, ku ka pasur reagim për dalje në vendin e aksidentit. Në Mitrovicë të Veriut, nga pranimi i informatës në arritjen e tyre në vendin e ngjarjes shënohet kohëzgjatja prej 21 minutash.

    Ndonëse, në Raport thuhet se në përgjithësi zyrtarët policorë të trafikut kanë të kryer trajnimin bazik në fushën e sigurisë së trafikut rrugor. Sipas IPK-së ka prej tyre që nuk kanë trajnime nga fusha e trafikut, për shkak se janë policë të rinj apo të lëvizur nga Njësi të tjera.

    “Nga të gjitha këto Njësi, vetëm 26 zyrtarë policorë kanë të kryer trajnime të avancuara për analizën e aksidenteve, edhe atë: Njësia për Kontrollin e Autostradës – tre policë, ndërsa sa i përket Njësisë së Trafikut Rrugor në Pejë janë trajnuar shtatë policë; në Mitrovicë të Veriut – tre, Mitrovicë të Jugut – dy, Gjilan – pesë, Gjakovë – dy, Ferizaj – një dhe Prishtinë – tre.” – përfundon IPK-ja.

     

  • Policia: Vjedhje në dy restorante në Jezerc të Ferizajit

    Katër persona janë arrestuar nën dyshimin se kanë kryer dy raste të vjedhjeve të rënda, të cilat kanë ndodhur në fshatin Jezerc të Ferizajit.

    Policia mëson se 21-vjeçari M.G., 22-vjeçari L.B., 33-vjeçari XH.G. dhe 32-vjeçari G.H., me qëllim përfitimi të kundërligjshëm pasuror kishin depërtuar me forcë në dy restorante, duke vjedhur gjësende të ndryshme.

    “Në restorantin e parë janë vjedhur tre televizorë dhe tre të tjerë janë dëmtuar (vlera rreth 6,000 euro). Arka fiskale, një monitor dhe kabllo elektrike (vlera rreth 8,000 euro). Është dëmtuar gjithashtu edhe dera e hyrjes. Në restorantin e dytë janë vjedhur një gjenerator elektrik (vlera rreth 1,400 euro), disa shishe alkoolike të ndryshme, vlera nuk dihet.” – bën të ditur Policia e Kosovës.

    Më 15.01.2025, Policia thotë se ka arritur të identifikojë dhe të arrestojë këta katër persona të dyshuar. Sipas Policisë, me vendim të Prokurorit të Shtetit, të dyshuarit janë ndaluar për 48 orë.

    “Sendet e vjedhura janë sekuestruar përkohësisht nga Policia.” – thuhet në njoftim.

  • Renovimi i shtëpive në veri, ministri Rashiq e quan “të improvizuar” mënyrën se si punon MAPL

    Në një takim informues në Komunën e Mitrovicës së Veriut mbi statuset e regjistrimit civil, ku ishte i pranishëm ministri Nenad Rashiq, asamblisti i Iniciativës Qytetare, Betim Osmani ngriti çështjen e renovimit të banesave në Mitrovicën e Veriut, rindërtimin e shtëpive të djegura gjatë luftës e kthimin e qytetarëve shqiptarë në këto vendbanime.

    Sipas këtij të fundit, ministritë nuk janë duke punuar në këtë drejtim.

    “Këto ministritë që po ndërtojnë, shumica as ujin e kanalizimin nuk janë duke e rregulluar nëpër shumicën e këtyre ndërtimeve që po ndodhin. Nuk e di sa jeni të informuar ose sa doni me u involvu në këtë çështjen e kthimit. Se me këtë trend të kthimit ne do të presim edhe dhjetë vite për t’u kthyer në pronat tona. Aq dobët edhe ngadalë është duke funksionu kthimi në veriun e Mitrovicës”- tha ai.

    Ministri për Komunitete dhe Kthim, Nenad Rashiq, tha se mënyrën se si punon ministri i Administrimit të Pushtetit Lokal, Elbert Krasniqi, e konsideron të improvizuar, duke potencuar se “nuk dua të punoj kështu”.

    “Këto dy vitet e fundit e konsideroj temën komplekse dhe ju duhet më shumë kohë për të iniciuar. Ne e kemi pranuar trashëgiminë dhe me kaq duhet të merremi… mendoj se kur të fillojmë me rikthim në Mitrovicë duhet të jemi mjaft të organizuar dhe më lejoni të them qartë se nuk do të ketë konfuzion. Unë mendoj se mënyra se si funksionon Ministria e Administrimit të Pushtetit Lokal, kolegu im i nderuar Elbert, është për mendimin tim, të improvizuar. Nuk dua të punoj kështu. Unë dua të punoj me elementet që përmende, jo një shtëpi si e tillë, por me pajisje percjellëse si edhe mobilje…”- u shpreh Rashiq.

    Në dhjetor të vitit të kaluar, kryetari i Mitrovicës së Veriut, Erden Atiq, kishte thënë se Komuna e tij nuk ka fonde për renovimin e rreth 40 banesave në Mitrovicën e Veriut.

    Gjatë debatit në “Jeta në Komunë”, Atiq ka thënë se për këto renovime e pret ndihmën e Ministrisë së Administrimit të Pushtetit Lokal (MAPL).

    “Ministria, njëra prej ministrive me gjasë më të madhe Ministria e Administrimit të Pushtetit Lokal, do ta bëjë renovimin e ndërtesave të cilat i ka liruar Agjensioni për Verifikimin e Pronës, nën një. Nën dy edhe ne si Komunë kemi kërkesa, nuk shkon një javë dy, në javë një herë minimumi kam takim me qytetarët që kërkojnë sanimin. Nuk kemi pare, me pasë pare e kishim bo, por s’kemi”- kishte thënë Atiq.

    Në shtator të vitit 2023, Qeveria e Kosovës ka marrë vendim për rindërtimin dhe renovimin e shtëpive individuale në Mitrovicë të Veriut për familjet të cilave u janë dëmtuar shtëpitë gjatë periudhës kohore 1998-1999.

    Më 23.11.2023 është hapur thirrja për ndërtimin e shtëpive në veri, Qeveria ka miratuar kërkesën e Ministrisë për 1 milion euro.

  • Faktet e gjendjes civile në Mitrovicë e Veriut – MPB-ja apel qytetarëve të aplikojnë në Regjistrat e shtetit të Kosovës

    Në Komunën e Mitrovicës së Veriut më 15.01.2025 është mbajtur takimi informues mbi statuset e regjistrimit civil, i cili do të realizohet gjatë periudhës 1 shkurt – 30 prill 2025.

    Sipas vendimit të Minitrisë së Punëve të Brendshme, qytetarët që kanë qenë të regjistruar në institucionet ilegale paralele të Serbisë do të kenë mundësi të regjistrohen në Regjistrat e Republikës së Kosovës.

    Të pranishëm në këtë takim ishin ministri për Komunitete dhe Kthim Nenaq Rashiq, drejtori i Drejtoratit të Regjistrimit Civil në Ministrinë e Brendshme, Ahmet Jashari, asamblistë e qytetarë serbë.

    Drejtori për Regjistrim Civil në MPB, Ahmet Jashari u bëri apel qytetarëve që të aplikojnë për regjistrimin e gjendjes civile (lindjen, martesën dhe/apo vdekjen) në Regjjistrat e Republikës së Kosovës.

    “E kemi bërë me pasë një informim për qyetatarët, për Vendimin e Ministrisë për Regjistrimin e Gjendjes Civile. Të gjitha këto fakte të gjendjes civile në strktura paralele…, ky Vendim mundëson që të njëjtit të regjistrohen në Regjistrat e Republikës së Kosovës. Ju lutem sa më shumë ndani këtë informacion me familjarë, qytetarë, lagje edhe ato në vijat më të thella.” – tha ai.

    Pyetur nga KALLXO.com se sa pritet të jetë numri i qytetarëve serbë, të cilët prej vitit 1999 kanë qenë të regjistruar në institucione paralele, Jashari tha mund të jetë 2,000 deri në 3000.

    “Ne nuk mundemi me pasë ndonjë statistikë, se ato nuk kanë qenë organet tona, por përafërsisht besojmë se përmes atyre informacioneve jozyrtare mundet me qenë një numër 2000-3000 vetë. Kjo e përfshin periudhën që nga paslufta deri në vitin 2024. Por, nuk është prapë një shifër e saktë.” – përfundoi ai.

    Ministria e Punëve të Brendshme ka njoftuar se ka miratuar Vendimin, përmes të cilit u mundëson të gjithë qytetarëve të Kosovës të cilët kanë regjistruar faktet e gjendjes së tyre civile (lindjen, martesën dhe/apo vdekjen), në strukturat ilegale e paralele serbe gjatë periudhës nga 10 qershori 1999, deri në hyrjen në fuqi të këtij Vendimi të aplikojnë për regjistrimin e këtyre fakteve në Regjistrin Qendror të Gjendjes Civile të Republikës së Kosovës.

    MPB, më 29.11.2024, ka thënë se ky Vendim është një hap i rëndësishëm drejt zbatimit të ligjshmërisë për formalizimin e statusit civil të qytetarëve, në përputhje me Kornizën Ligjore të Republikës së Kosovës. Tutje është bërë e ditur se procesi i regjistrimit do të kryhet nga Agjencia për Regjistrimin Civil dhe do të jetë i hapur nga data 1 shkurt 2025 deri më 30 prill 2025.

    https://kallxo.com/lajm/mpb-miraton-vendimin-per-regjistrimin-e-fakteve-te-gjendjes-civile/