Një tërmet me 2.6 shkallë të Rihterit ka goditur Kosovën në orët e pasditёs të së hёnёs, më 06.01.2024.
Qendra Sizmologjike Europiane e Mesdheut (EMSC) ka njoftuar se tërmeti është ndjerë në afërsi të kufirit mes Kosovës, Serbisë dhe Maqedonisë së Veriut.
Thellësia e tërmetit ishte 8 km.
Një valë dëbore, akulli, erërash dhe temperaturat në rënie krijuan kushte të rrezikshme udhëtimi në shtetet qendrore dhe jugore amerikane deri në brigjet lindore të vendit, duke detyruar mbylljen e shkollave dhe institucioneve qeveritare në disa shtete.
Bora dhe akulli mbuluan rrugët kryesore në Kansas, Nebraskën perëndimore dhe pjesë të Indianës, ku Garda Kombëtare e këtij shteti u aktivizua për të ndihmuar udhëtarët e bllokuar në makina. Pritej që dëbora të arrinte në të paktën 20 centimetra, së bashku me erëra të forta deri në 72 km/orë.
Shërbimi Kombëtar i Motit lëshoi paralajmërime për stuhi dimërore nga Kansasi në Misuri deri në Nju Xhersi.
“Disa zona në këtë rajon që do të kenë sasitë më të mëdha të borës, këto mund të jenë reshjet më të mëdha në të paktën një dekadë”, tha shërbimi i motit .
Vorbulla polare e ajrit tepër të ftohtë zakonisht rrotullohet përreth Polit të Veriut. Njerëzit në Shtetet e Bashkuara, Evropë dhe Azi e përjetojnë të ftohtin e tij intensiv kur rrymat e ajrit zhvendosen drejt jugut.
Studimet tregojnë se ngrohja e shpejtë në Arktik është pjesërisht shkaktare për frekuencën në rritje të vorbullës polare që zgjeron ndikimin e saj të akullt.
Anulohet mësimi në shkolla
Të hënën shkollat u mbyllën në rang të gjerë. Rajonet në Indiana, Virxhinia dhe Kentaki njoftuan anulimin e mësimit të dielën pasdite.
Shkollat publike në Kentaki anuluan mësimet, aktivitetet jashtë mësimore dhe sportive për afro 100 mijë nxënës.
Shkollat u mbyllën dhe në Merilend, ku guvernatori Wes Moore shpalli gjendjen e emergjencës të dielën dhe njoftoi se insitucionet shtetërore do ishin mbyllur të hënën.
“Siguria e banorëve të Merilendit është përparësia jonë. Ju lutem mos qarkulloni gjatë kësaj stuhie. Merrni masa për familjen dhe shtëpinë tuaj dhe karikoni mjetet e komunikimit në rast se do të ketë një ndërprerje energjisë elektike”, tha zoti Moore përmes një deklarate./VOA.
Kryeministri i Kanadasë, Justin Trudeau, njoftoi dorëheqjen të hënën, pas rritjes së pakënaqësive me udhëheqësin e tij dhe pasi largimi i papritur i ministres së tij të Financave vuri në pah rrëmujën brenda Qeverisë së tij.
Trudeau tha se “betejat e brendshme” nënkuptojnë se ai “nuk mund të jetë mundësia më e mirë” për zgjedhjet e ardhshme.
Ai tha se do të qëndrojë si kryeministër derisa Partia Liberale në pushtet ta zgjedhë liderin e vet të ri.
Trudeau tha se Parlamenti, i cili duhej ta rifillonte punën më 27 janar, do të pezullohet deri më 24 mars. Kjo kohë do t’ia mundësojë Partisë Liberale ta zgjedhë liderin e ri.
Të gjitha tri partitë në opozitë kanë thënë se synojnë ta rrëzojnë Partinë Liberale nga pushteti përmes votës së mosbesimit sapo ta rifillojë punën Parlamenti, prandaj është pothuajse e sigurt mbajtja e zgjedhjeve në pranverë.
Trudeau erdhi në pushtet në vitin 2015, pas 10 vjetësh sundimi nga Partia Konservatore. Në fillim, ai u lartësua për rikthimin e vendit në të kaluarën e tij liberale.
Por, 53-vjeçari, pasardhësi i një prej kryeministrave më të famshëm të Kanadasë, është bërë jashtëzakonisht i papëlqyeshëm për votuesit vitet e fundit për një sërë çështjesh, përfshirë rritjen e çmimeve të ushqimit dhe banimit, si dhe për shkak të numrit të madh të imigrantëve.
Trudeau ka qëndruar publikisht i heshtur javët e fundit, megjithëse është përballur me trysni të madhe për të dhënë dorëheqjen.
Ish-ministrja e Financave e Kanadasë, Chrystia Freeland, njoftoi dorëheqjen e saj nga kabineti i Trudeaut më 16 dhjetor, duke kritikuar disa nga prioritetet ekonomike të tij. Ky hap e tronditi vendin dhe ngriti pyetje se sa më gjatë mund të qëndronte në detyrë Trudeau, i cili po humbiste gjithnjë e më shumë popullaritet.
Trudeau synonte të garonte edhe për mandatin e katërt në zgjedhjet e vitit të ardhshëm, pavarësisht pakënaqësive në rritje mes anëtarëve të Partisë Liberale. Së fundmi, partia pësoi disfatë në zgjedhjet speciale në dy distrikte në Toronto dhe Montreal, të cilat i kishte mbajtur për vite me radhë.
Asnjë kryeministër kanadez në më shumë se një shekull nuk i ka fituar katër mandate radhazi.
Dhe, sipas sondazheve të fundit, shanset e Trudeaut për sukses dukeshin të pakta. Në sondazhin e fundit nga Nanos, liberalët janë pas konservatorëve, 47% kundrejt 21%.
Gjatë gati një dekade në pushtet, Trudeau ka përqafuar një sërë kauzash të preferuara nga baza e tij liberale. Ai ka folur në favor të imigracionit në një kohë kur vendet të tjera po përpiqeshin t’i forconin kufijtë e tyre. Ai ka mbështetur diversitetin dhe barazinë gjinore, duke emëruar një kabinet të përbërë në mënyrë të barabartë nga burra dhe gra. Ai legalizoi kanabisin.
Përpjekjet e tij për të gjetur një baraspeshë midis rritjes ekonomike dhe mbrojtjes së mjedisit u kritikuan si nga e djathta ashtu edhe nga e majta.
Në Kanada vdiqën më pak njerëz nga COVID-19 krahasuar me vendet e tjera, dhe Qeveria e tij ofroi mbështetje të madhe financiare. Por, armiqësia u rrit mes atyre që kundërshtonin vaksinimin e detyrueshëm. Flamuj me emrin e Trudeaut dhe fyerje u bënë pamje e zakonshme në zonat rurale.
Një kombinim skandalesh dhe politikash të papëlqyeshme dëmtoi perspektivat e tij me kalimin e kohës./REL.
SPAK ka përfunduar hetimet ndaj ish-kreut të Prokurorisë së Vlorës, Aurel Zarka dhe tre të pandehurve të tjerë të akuzuar për korrupsion e ndikim të paligjshëm tek funksionarët e drejtësisë për lehtësimin e akuzave në 4 çështje që kishin të bënin me dosjen e njohur si “Toyota Auris” dhe 4 çështje të tjera penale, ndërkohë që është veçuar hetimi për prokurorët e gjyqtarët që përmenden në bisedat dhe komunikimet e të akuzuarve për veprime korruptive.
Prokuroria e Posaçme kundër Korrupsionit dhe Krimit të Organizuar, SPAK njoftoi të shtunën më 4 janar përfundimin e hetimeve paraprake ndaj ish-kreut të Prokurorisë së Vlorës Aurel Zarka dhe tre të pandehurve të tjerë të akuzuar për ushtrim ndikimi në katër çështje penale që lidhen me dosjen e “Toyota Auris”, një hetim pasuror të Suel Çelës dhe tre çështje të tjera. Dosja penale në ngarkim të Zarkës, ish-oficeres së policisë gjyqësore Eriona Daupaj, avokatit Radovan Çela dhe biznesmenit Astrit Vladi është dërguar në gjykatë për tu kaluar për gjykim, ndërkohë që është ndarë çështja për të hetuar në vijim prokurorët, gjyqtarët apo funksionarët e drejtësisë që dyshohet se lehtësuan akuzat për këto dosje. Hetimet për këtë çështje u nisën bazuar në të dhënat e administruara nga aplikacionet SKY ECC.
Sipas prokurorisë, është provuar fakti se katër të pandehurit në bashkëpunim me njëri tjetrin, në disa raste, kanë ofruar dhe kanë premtuar përfitime të parregullta për të ushtruar ndikim te funksionarë të drejtësisë; kanë pranuar premtime dhe përfitime të parregullta për të ushtruar ndikim të paligjshëm te funksionarë të drejtësisë; kanë ofruar përfitime të parregullta për funksionarë të drejtësisë; si dhe kanë kërkuar përfitime të parregullta për të kryer veprime të lidhura me funksionin dhe detyrën e tyre, sipas episodeve dhe akuzave respektive për secilin prej tyre.
Në kohën e kryerjes së veprimeve të kundraligjshme, Zarka ka qenë në funksionin e prokurorit në Prokurorinë e Vlorës, e pandehura Eriona Daupaj ka qënë në funksionin e oficeres së policisë gjyqësore në ish-Prokurorinë e Krime të Rënda dhe më pas në SPAK, ndërsa i pandehuri Radovan Çela ka qenë në cilësinë e mbrojtësit të shtetasve Alfred Vladi e personave të tjerë.
Sipas SPAK, prokurori Zarka dhe personat e tjerë akuzohen se kanë ushtruar ndikim të paligjshëm për tetë çështje penale që po hetoheshin në katër prokurori të ndryshme – çështje të cilat lidhen kryesisht me aktivitete të krimit të organizuar si pastrimi i parave apo kultivimi i narkotikëve.
Interesi kryesor lidhej me çështjen penale të njohur publikisht si “Toyota Auris”, e cila u regjistrua pas bllokimit në portin e Durrësit në qershor të vitit 2018 të 3.4 milionë eurove të thata të fshehura në dy makina të përdorura dhe të importuara nga Belgjika.
Në lidhje me ngjarjen, u arrestuan fillimisht Klevi Cani, Edi Lika dhe Alban Mollaymeri dhe u akuzuan kushërinjtë Elvis Vladi dhe Alfred Vladi. Astrit Vladi është vëllai i Elvis Vladit.
Hetimet e atëhershme dështuan të provonin se trafiku i parave përmes makinave të përdorura ishte pjesë e një skeme të pastrimit të parave. Një investigim i mëparshëm i BIRN gjeti se si prokuroria dhe më pas gjykata pranuan si provë alibinë e të akuzuarve – duke e çuar çështjen përfundimisht në gjykatë për veprën penale të “modeklarimit të të hollave në kufi”.
Sipas SPAK, prokurori Zarka në bashkëpunim me Erjona Dautin, Astrit Vladin dhe Radovan Çelën kanë ushtruar ndikim të paligjshëm përgjatë viteve 2018-2020 për katër çështje penale që lidheshin me të pandehurit Elvis Vladi, Alfred Vladi dhe Alban Mollaymeri.
Një tjetër çështje ku dyshohet se është ushtruar ndikim lidhet me hetimin pasuror ndaj Suel Çelës në shkurt 2020 nga Prokuroria e Posaçme – një personazh i akuzuar për përfshirje në krim të organizuar në Elbasan dhe i shpallur në kërkim si i dyshuar për vrasje.
Tre çështjet e tjera penale ku dyshohet se është ushtruar ndikim i paligjshëm u hetuan nga Prokuroria e Tiranës dhe ajo e Vlorës.
Aurel Zarka akuzohet se ka ushtruar ndikim të paligjshëm 3 herë, nga të cilët 2 herë në bashkëpunim. Po ashtu, ai akuzohet se ka kryer korrupsion aktiv e pasiv. Ish-oficerja e policisë gjyqësore, Eriona Daupaj akuzohet se ka kryer ushtrim ndikimi 4 herë, nga të cilët në 2 raste e ka realizuar në bashkëpunim. Ajo akuzohet dhe për zbulim të akteve e të dhënave sekrete dhe korrupsion pasiv në 2 raste.
Avokati Radovan Çela akuzohet për ushtrim ndikimi të paligjshëm në 5 raste, kur 4 herë ka vepruar në bashkëpunim, ndërsa Astrit Vladi akuzohet se ka kryer 4 herë ushtrim ndikimi të paligjshëm në bashkëpunim dhe korrupsion aktiv.
Në njoftim thuhet se më 26 dhjetor, prokurorët kanë vendosur ndarjen e çështjes penale dhe vijimin e hetimeve lidhur me prokurorët, gjyqtarët e funksionarët e tjerë të drejtësisë që përmenden në bisedat e të pandehurve. Sipas prokurorisë, veçimi i akteve ka të bëjë me një sërë komunikimesh të kryera nga të pandehurit për rrethanat e çështjeve ku kanë ndikuar, si edhe në lidhje me biseda që kanë të bëjnë me fakte dhe rrethana të tjera që kanë dalë gjatë veprimeve hetimore.
Konkretisht, është vendosur ndarja dhe veçimi i akteve në lidhje me bisedat e kryera nga të pandehurit dhe personat e tjerë, në përmbajtjen e të cilave përmenden prokurorë, gjyqtarë e funksionarë të tjerë të organeve të drejtësisë, për të cilët pretendohet se kanë kërkuar apo kanë marrë përfitime të parregullta.
Nga bisedat dhe komunikimet e administruara janë konstatuar të dhëna se edhe persona të tjerë mundet të kenë kryer ushtrim ndikimi të paligjshëm ndaj prokurorëve, gjyqtarëve apo funksionarëve të organeve të tjera të drejtësisë. Po ashtu, janë ngritur dyshimet se mundet të jenë kryer veprime që përmbajnë elementë të veprave të tjera penale./Reporter.al.
Në shtetin e Xhorxhias, vendlindjen e ish-Presidentit Jimmy Carter po vazhdojnë ceremonitë në nderim të jetës dhe trashëgimisë së tij.
Gjashtë ditët e funeralit për Presidentin e 39 të Shteteve të Bashkuara filluan të shtunën në Xhorxhia, ku ai vdiq më 29 dhjetor në moshën 100-vjeçare.
Këto ditë, dielli shkëlqen ndryshe mbi qytetën Plains të Xhorxhias, për Philip Kurlandin, pronar i një dyqani, ndërsa ai dhe të tjerë në këtë komunitet rural prej 700 vetësh vajtojnë ndarjen nga jeta të banorit të tij më të famshëm, Jimmy Carter.
“Po shpresonim që të planifikonim festimet për ditëlindjen e tij të 101, por ai do të jetë pranë Rosalynnës, do të jetë në diku larg, më mirë, ndërsa sa jetoi bëri gjithçka që mundi për këtë komunitet dhe për tërë botën”, shprehet Philip Kurland, pronar i dyqanit “Plains Trading Post”.
Ndërsa për agjentët e shërbimit sekret, që e mbrojtën atë për afro 5 dekada në më shumë se 140 shtete ai njihej me emrin e koduar “Deacon”, (një emër që reflektonte besimin e tij të fortë fetar), Jimmy Carter është më shumë se një ish-President dhe një humanitar për ata që jetuan krah tij në këtë vend, që ai e quajti shtëpi, për një shekull.
Ndërsa makina e funeralit me trupin e zotit Carter dhe autokolona që e shoqëronte kalonte përmes qytezës Plains, duke shënuar fillimin e 6 ditëve të funeralit shtetëror në nderim të tij, zoti Kurland kujton ndikimin që pati tek ai personalisht, ish-Presidenti. “Ishte heroi im”, thotë ai.
“Është fillimi dhe fundi”, thotë Jill Stuckey nga Parku Kombëtar Historik “Jimmy Carter”.
Jill Stuckey është mikeshë e familjes Carter dhe mbikqyrëse e Parku Kombëtar Historik “Jimmy Carter”, që përfshin edhe fermën në pronësi të familjes së tij, në Archer, një prej ndalesave të autokolonës me trupin e zotit Carter. “Një president fillon të planifikojë funeralin e tij një ditë pasi është zgjedhur, kështu që funerali është planifikuar për dekada të tëra”, shprehet zonja Stuckey.
Një plan që zonja Stuckey dhe të tjerë po e ndjekin plotësisht.
“Nuk e kam vajtuar akoma. Ka të ngjarë ta bëj kur funerali shtetëror të ketë mbarur”, shprehet Kim Fullerm, mbesa e ish-Presidentit Jimmy Carter.
Kim Fuller është mbesa e Jimmy Carter, vajza e vëllait të tij të njohur Billy Carter. Ajo është gjithashtu fqinja e tij në qytezën Plains dhe vazhdon trashëgiminë e ish-Presidentit në Kishën Baptiste Maranatha, ku vetë zoti Carter, një i krishterë evangjelist i përkushtuar, jepte mësim në orët e katekizmit, që kur u largua nga Shtëpia e Bardhë në 1981.
Ndërsa e pranon se aktivitetet e funeralit po e mbajnë të zënë, ajo thotë se ka momente të vështira reflektimi.
“Në një moment ndjeva shumë trishtim, po i bëjmë të gjitha këto sepse ai ka vdekur, nuk kthehet më. U desh të largohesha për pak. Ka çaste kur më kaplon një trishtim i madh”, thotë Kim Fuller.
Ndërsa forcat e ushtrisë amerikane mbajnë arkivolin ish-Presdentit Carter të mbuluar me flamurin amerikan, në Qendrën Presidenciale Carter në Atlanta, mijëra vizitorë, si Walter Ramsey kanë mundësinë të nderojnë Presidentin e vetëm nga shteti i Xhorxhias.
“Nuk e kam jetuar periudhën e Presidencës së tij, por ky funeral na ndihmon të ndjejmë sikur e kemi njohur Jimmy Carterin”, shprehet Walter Ramsey, banor i Atlantas.
Njerëzit do të kenë mundësi që të bëjnë homazhe në nderim të ish-Presidentit Jimmy Carter në Qendrën Presidenciale Carter deri të martën, ditë kur trupi i tij do të zhvendoset në Kapitolin e shtetit të Xhorxhias, për ceremonitë shtetërore. Trupi i tij do të rikthehet në Xhorxhia në 9 janar, për ceremoni shtetërore dhe private.
Ish-Presidenti i 39-të i Shteteve të Bashkuara do të prehet në qytetën Plains./VOA.