Ballina

Autor: Arjana Berisha

  • Haxhiu në Podujevë flet për aksionin ndaj strukturave paralele: Ata prokurorë që nuk guxojnë le të rrinë në shtëpi

    Ministrja e Drejtësisë, Albulena Haxhiu, gjatë tubimit elektoral të mbajtur në Podujevë ka folur për aksionin e Policisë së Kosovës të zhvilluar sot, më 15.01.2025, ndaj strukturave paralele serbe në disa komuna të Kosovës.

    Ajo falënderoi Policinë dhe ministrin e Brendshëm, Xhelal Sveçla, ndërsa tha se Prokuroria i la vetë duke thënë se nuk kanë dorë në mbylljen e strukturave paralele.

    Haxhiu u “çoi” mesazh prokurorëve duke iu kërkuar të shkojnë në shtëpi.

    “Me lejoni të përshëndes Policinë e Kosovës dhe ministrin Sveçla. Sot ministri dhe Policia u la vetë nga Prokuroria. Ata thanë që ne s’kemi dorë në mbylljen e strukturave paralele. Por edhe nga Llapi u çojmë mesazh atyre që ata prokurorë që nuk guxojnë le të shkojnë sepse vendi i tyre nuk është në prokurori, le të rrinë në shtëpi, por nëse përnjëmend nuk i kryejnë detyrat duhet me dhënë përgjegjësi për këtë”- ka thënë Haxhiu.

    “Do të angazhohemi që në Kosovë me pasë shtet të së drejtës dhe të gjithë prokurorët që nuk veprojnë – me u përgjigj para ligjit”- shtoi tutje ajo.

    https://kallxo.com/lajm/policia-per-aksionin-ndaj-strukturave-paralele-thote-se-nderpreu-aktivitetet-e-disa-institucioneve-te-jashteligjshme/

    Mëngjesin e së mërkurës, Policia e Kosovës zhvilloi një aksion të gjerë në disa komuna të Kosovës, duke mbyllur dhjetëra objekte të strukturave paralele serbe, përfshirë objekte komunale, posta e zyra të Administratës Tatimore të Serbisë.

    Përmes një komunikate Policia njoftoi se qëllimi i aksionit ishte ndërprerja e aktiviteteve të disa institucioneve të jashtëligjshme që vepronin si komuna, posta, banka, etj.

    “Policia e Kosovës me njësitë e saja relevante, sot në orët e hershme të mëngjesit, në bashkëpunim dhe koordinim me institucionet përkatëse të Republikës së Kosovës, ka realizuar një operacion të gjerë policor, operacion ky i shtrirë në disa rajone të Kosovës: DRP Prishtinë, DRP Gjilan, DRP Gjakovë dhe DRP Mitrovicë Jugu, për ndërprerjen e aktiviteteve të disa institucioneve të jashtëligjshme që vepronin si komuna, posta, banka, etj., të cilat ofronin shërbime të jashtëligjshme, kundër rendit kushtetues dhe ligjeve pozitive të Republikës së Kosovës”- tha Policia përmes komunikatës.

    Por, Prokuroria e Prishtinës përmes një komunikate më 15.01.2025 ka njoftuar se prokurori i shtetit nuk ka autorizuar kryerjen e bastisjeve nga ana e Policisë në disa lokacione për shkak të dyshimit se ekzistojnë struktura paralele.

    https://kallxo.com/lajm/prokuroria-e-prishtines-konfirmon-se-nuk-qendron-prapa-bastisjeve-ne-objektet-e-strukturave-paralele/

  • Eman Rrahmani në Mitrovicë premton nga 500 euro në muaj për gratë lehona

    Koalicioni për Familjen më 15.01.2025 ka mbajtur tubim elektoral në qytetin e Mitrovicës duke vazhduar fushatën për zgjedhjet e 09.02.2025.

    I pari këtij Koalicioni, Eman Rrahmani, ka thënë se garantojnë që do të realizojnë projektin për mbështetjen e nënave.

    Ai ka premtuar se për secilën grua që lind fëmijë do të ketë mbështetje financiare prej 500 eurove çdo muaj për dy vite.

    “E keni pa se çka është provu të bëhet në vendin tonë. Ju në Mitrovicë keni edhe probleme për shkak të aktiviteteve të strukturave paralele në veri. E di që e keni edhe më të domosdoshme dhe më të nevojshme që të angazhohemi që kjo kauzë të shkojë përpara sepse nuk mundemi që në 2025 nataliteti të jetë më i lartë në vendet fqinje se në Mitrovicë”- ka thënë ai.

    Ai ka shtuar se ky Koalicion nuk lejon martesat mes personave të gjinisë së njëjtë.

    Ndërsa, kandidati për deputet i këtij Koalicioni, Selim Pacolli, ka thënë se këto subjekte politike janë bërë bashkë me qëllimin për të mbrojtur familjen e traditave.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Limaj në Klinë: Kryeministri e ka humbur rrugën

    Kryetari i Nismës Socialdemokrate, Fatmir Limaj, gjatë një tubimi elektoral të mbajtur më 15.01.2025 në Klinë, deklaroi se Kosovës i duhet një kryeministër që i bashkon qytetarët e nuk harxhon energji në përçarje.

    Sipas Limajt, kryeministri Albin Kurti “e ka humbur rrugën”.

    “Kosovës i duhet një kryeministër që i bashkon qytetarët, shuan polarizimet, nuk harxhon energji kot në përplasje, në përçarje, në shpifje e mashtrime. Kryeministri jonë e ka humbur rrugën. E ka harruar punën që ia ka besuar qytetari i Kosovës. Në vend se ta ndërtojë vendin ai fuqishëm angazhohet me ta përçarë vendin”- u shpreh Limaj.

    Ai ka thënë se më shumë se kurrë Kosova ka nevojë për njerëz të pjekur, të ditur e për zëra racionalë.

    E kandidati i këtij koalicioni për kryeministër, Ramush Haradinaj, gjatë këtij tubimi ka thënë se ekzistojnë norma se si arrihet siguria e një shteti në mënyrë të përjetshme, duke thënë se formulë e sigurisë kolektive është bashkimi në NATO.

    “Ne jemi popull, kemi të drejta, duam të zhvillohemi si popujt e tjerë. Nuk duam të jetojmë në improvizime. Unë e kam ditur këtë herët që kur janë bërë ligjet e ushtrisë”- është shprehur Haradinaj.

    Aleanca për Ardhmërinë e Kosovës dhe partnerët e saj të koalicionit, Nisma Socialdemokrate, Konservatorët, Forumi Intelektual E-30, dhe Lista Ideal më 15.01.2025 e kanë vazhduar fushatën politike në Grabanicë të Klinës.

    Në zgjedhjet e shkurtit, dega e AAK-së në Klinë ka tre kandidatë në listë për deputetë të Kuvendit të Kosovës.

    Haradinaj ka takuar sot të Ngarkuarën me Punë në Ambasadën amerikane në Kosovë, Anu Prattipati, me të cilën tha se diskutuan për zhvillimet aktuale në Kosovë dhe rajon, me theks të veçantë në forcimin e partneritetit strategjik Kosovë-SHBA.

    “Konfirmova edhe një herë qëndrimin tonë të palëkundur për avancimin e vlerave demokratike dhe orientimin euro-atlantik të Kosovës. Bashkëpunimi me SHBA-të mbetet thelbësor për sigurinë dhe prosperitetin e vendit tonë, ndërsa anëtarësimi direkt në NATO përmes Planit Aksional është rruga më e mirë për ta arritur këtë objektiv”- ka thënë Haradinaj.

    Ndërsa gjatë ditës, Haradinaj njoftoi se koalicionit i është bashkuar Veli Kryeziu, intelektual i shquar për kontributin e tij në fushën shkencore të historisë.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • KQZ shtyn afatin për akreditimin e vëzhguesve të subjekteve politike

    Komisioni Qendror i Zgjedhjeve (KQZ) mori vendim për shtyrjen e afatit për subjektet politike, për aplikim për akreditimin e vëzhguesve.

    Afati i paraparë të përfundonte sot më 15 janar është shtyrë për 20 janar 2025.

    Sipas anëtarëve të KQZ-së kjo shtyrje po vjen për shkak se periudha për aplikimin për akreditimin e vëzhguesve ka filluar 6 ditë më vonesë, sesa ishte planifikuar.

    Po sipas anëtarëve të KQZ-së shtyrja e këtij afati nuk pengon aspak rrjedhën e planit të aktiviteteve të miratuar më parë.

    Fushata pёr Zgjedhjet parlamentare nё Kosovё ka filluar zyrtarisht mё 11.01.2025. Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për Zgjedhjet e 9 shkurtit 2025.

    Këto do të jenë Zgjedhjet e para të rregullta, që Kosova mban që nga shpallja e Pavarësisë më 2008.
     

  • RTS: Petkoviq largohet nga takimi në Bruksel pas aksionit policor kundër strukturave ilegale serbe në Kosovë

    Në Bruksel ishte caktuar që sot, më 15.01.2025, të mbahej takimi i parë i Komisionit të Përbashkët të Kosovës dhe Serbisë për të Pagjeturit.

    Televizioni serb RTS ka raportuar se shefi i delegacionit të Serbisë, Petar Petkoviq është larguar nga takimi, për shkak të zhvillimeve lidhur me aksionin policor kundër strukturave ilegale serbe në Kosovë.

    “Kryenegociatori i Beogradit, Petar Petkoviq i ndërpreu e u largua nga bisedimet në Bruksel për shkak të terrorit të paparë e dhunës institucionale të Prishtinës e Albin Kurtit ndaj serbëve dhe mbylljes së institucioneve të shumta serbe në Kosovë.” – ka thënë delegacioni i Beogradit, më 15.01.2025.

    Ngritja e këtij Komisioni është bërë në bazë të një Marrëveshjeje të arritur vitin e kaluar në kuadër të Dialogut për normalizimin e raporteve mes Kosovës dhe Serbisë, që ndërmjetësohet nga Bashkimi Evropian, për zbatimin e Deklaratës për Personat e Zhdukur.

    Në takim, delegacioni i Kosovës do të udhëhiqet nga Halil Cenaj – bëri të ditur kryetari i Komisionit qeveritar për Personat e Zhdukur, Andin Hoti.

    https://kallxo.com/lajm/aksioni-policor-ne-disa-komuna-deklarohen-ministrat-krasniqi-dhe-svecla-video/

    “Ka përfunduar epoka e Komunave dhe institucioneve paralele e kriminale të Serbisë në Kosovë.” – kanë deklaruar ministri i Punëve të Brendshme, Xhelal Sveçla dhe ai i Administrimit të Pushtetit Lokal, Elbert Krasniqi.

    Deklarata e tyre vjen pas aksionit policor në disa Komuna të vendit kundër strukturave ilegale serbe.

    Aksioni u zhvillua edhe në bashkëpunim me Ministrinë e Industrisë, Ndërmarrësisë dhe Tregtisë (MINT).

    Sveçla ka thënë se të mërkurën, më 15.01.2025, janë mbyllur Komunat paralele të Serbisë në: Lipjan, Obiliq, Prishtinë, Fushë Kosovë, Vushtrri, Novobërdë, Kamenicë, Viti, Rahovec, Skenderaj, si dhe Posta e Zyra Tatimore ilegale.