Ballina

Autor: Arjana Berisha

  • AAK-ja mban tubim me të rinjtë e Deçanit, premton investime për bizneset e reja

    Aleanca për Ardhmërinë e Kosovës ka mbajtur tubim me të rinjtë e qytetit të Deçanit. Kandidati për deputet i AAK-së, Daut Haradinaj, e ka ftuar rininë e Deçanit ta votojnë numrin 137.

    “Nuk ka vend për mashtrues në Kosovë e aq më pak në Deçan”- u shpreh ai më 18.01.2025.

    “Ju jeni aq shumë dhe energjia juaj është aq e madhe sa me u ndje në krejt Kosovën. Nuk kam krenari më të madhe sesa kur flas për rininë e Deçanit pikërisht sepse çdoherë nga rinia e këtij vendi ka filluar gjithçka! Rinia e Deçanit ka bërë revolucione ndër dekada e do ta bëj edhe revolucionin e datës 9 shkurt”- ka thënë tutje ai.

    Kryetari i Komunës së Deçanit, Bashkim Ramosaj, gjatë fjalimit ka thënë se qytetarët e Kosovës nuk e meritojnë me i gënjy e mashtru, teksa, ka thënë se AAK gjithmonë ka punu për ta nderuar vendin.

    Ndërsa kandidati i AAK-së për kryeministër Ramush Haradinaj përmes një postimi në Facebook ka shpërndarë pamje nga tubimi duke premtuar 500 milionë euro për bizneset e reja.

    “Rinia e Kosovës është më e mira në botë. Janë shpirti e zemra e këtij populli. Ne nuk kemi djem e vajza për mërgim. E kemi obligim t’i kthejmë e të ardhmën e tyre ta garantojmë këtu, e jo në gyrbet. Krenar me Deçanin tim”- ka thënë ai.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Kurti në Gjilan, zotohet për investime milionëshe në 20 stadiume në komunat e Kosovës

    Kandidati për kryeministër i Lëvizjes Vetëvendosje, Albin Kurti, bashkë me disa prej anëtarëve të listës me të cilën garon në zgjedhjet parlamentare ka mbajtur tubim elektoral në qytetin e Gjilanit.

    Kurti ka thënë se gjatë katër viteve të qeverisjes së tij, Kosovën e kanë bërë të pavarur nga korrupsioni qeveritar dhe pazaret me Serbinë.

    “Në fund të këtij mandati tonë s’ka dyshim që këto katër vite ishin katër vitet më të mira jo vetëm në Kosovën e pa varur por që nga çlirimi”- u shpreh ai më 18.01.2025.

    Kurti ka theksuar se gjatë këtij mandati kanë rinovuar klinika, ndërsa thënë se për Spitalin e Gjilanit janë ndarë 8 milionë euro për renovimin e disa reparteve.

    Ai u zotua për investime milionëshe në 20 stadiume moderne në komunat e Kosovës.

    “Në mandatin tonë tjetër në përgatitje të Lojërave Mesdhetare me 200 milionë investime në total do t’i kemi 20 stadiume moderne në 18 komuna të Kosovës përfshirë stadiumin e Gjilanit. Stadiumin e Gjilanit do ta përfundojmë. Me na vonu na kanë vonu, me na ndalë nuk ka mundësi. Na kanë vonu ata që kontratën e kaluar e kanë bërë me shkelje”- u shpreh ai.

    Kurti tutje ka thënë se shqiptarët e Luginës me qeverinë e tij kanë linjë të rregullt buxhetore.

    Numri dy i listës së LVV-së, Glauk Konjufca gjatë fjalimit “ja uroi” Kurtit mandatin e tretë të Qeverisë që tash pasi tha se po e sheh përkrahjen e qytetarëve nëpër tubime.

    Sipas tij, Gjilani është ndër qytetet e para që është lidhur me Lëvizjen Vetëvendosje.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre, me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër, lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues, në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Komandanti i KFOR-it takohet me kryevëzhguesen e Misionit të BE-së për zgjedhjet, flasin për sigurinë

    Komandanti i KFOR-it, Enrico Barduani, ka pritur në takim kryetaren e Misionit të BE-së për Vëzhgimin e Zgjedhjeve, Nathalie Loiseau në Shtabin e KFOR-it në Prishtinë.

    Ata kanë diskutuar pikëpamjet për tema të ndryshme, duke përfshirë sigurinë e qëndrueshme në të gjithë Kosovën, situatën e stabilitetit rajonal dhe përpjekjet e vazhdueshme të Misionit të BE-së për Vëzhgimin e Zgjedhjeve në mbështetjen e zgjedhjeve transparente dhe demokratike në Kosovë.

    “Gjeneralmajor Barduani nënvizoi përkushtimin e vazhdueshëm të KFOR-it për të ofruar një mjedis të sigurt për të gjithë njerëzit që jetojnë në Kosovë, pavarësisht nga përkatësia etnike, gjinia, feja apo përkatësia politike”- thuhet në njoftimin e datës 18.01.2025.

    KFOR-i përsëriti se vazhdon të zbatojë mandatin e tij – bazuar në Rezolutën 1244 të Këshillit të Sigurimit të OKB-së të vitit 1999 – për të kontribuar në një mjedis të sigurt për të gjithë njerëzit dhe komunitetet që jetojnë në Kosovë dhe lirinë e lëvizjes, në çdo kohë dhe në mënyrë të paanshme.

    Zgjedhjet nacionale në Kosovë do të mbahen më 09.02.2025.

    Këto do të jenë zgjedhjet e para të rregullta që Kosova mban që nga shpallja e Pavarësisë në vitin 2008.

  • Parandalohet një rast i kontrabandimit me mallra në Ranillug

    Dogana e Kosovës dhe Policia ka njoftuar se ka parandaluar një rast të kontrabandimit me mallra në Ranillug.

    Sipas njoftimit, gjatë kontrollit janë gjetur mallra si: pije alkoolike dhe mallra të tjera ushqimore.

    Ndërsa thuhet se për mallin pronari nuk kishte dokumente mbi prejardhjen.

    “Dyshohet se malli ishte futur kontrabandë përmes rrugëve malore nga Serbia në Republikën e Kosovës”- thuhet në njoftimin e datës 18.01.2025.

    Po ashtu, është bërë e ditur se mallrat janë sekuestruar dhe dërguar në terminalin doganor për procedura të mëtutjeshme.

    Rasti është duke u trajtuar nga njësitet e Doganës së Kosovës.

  • Zyra e BE-së e uron Feride Rushitin dhe QKRMT-në për nominimin për çmimin Nobel për Paqe

    Feride Rushiti dhe Qendra Kosovare për Rehabilitimin e të Mbijetuarve të Torturës (QKRMT) janë nominuar për çmimin Nobel për Paqe 2025.

    Zyra e BE-së në Kosovë, e ka uruar Rushitin dhe QKRMT-në, duke theksuar punën e saj dhe të Qendrës që nga viti 1999.

    “Urime Feride Rushiti dhe QKRMT – Qendra Kosovare për Rehabilitimin e Viktimave të Torturës për nominimin e tyre për Çmimin Nobel për Paqe! Që nga viti 1999, ata kanë mbështetur dhe u japin zë viktimave të torturës dhe traumës, përfshirë të mbijetuarat e dhunës seksuale gjatë luftës së Kosovës. Ju urojmë suksese për t’u bërë fitues të Nobelit!”- ka shkruar Zyra e BE-së më 18.01.2025.

    Nominimi është bërë nga deputeti i Parlamentit të Suedisë, Magnus Jacobsson.

    Drejtoresha e Qendrës Kosovare për Rehabilitimin e të Mbijetuarve të Torturës, Feride Rushiti, deklaroi se nominimi për çmimin Nobel për Paqe për të dhe për organizatën që e drejton është një vlerësim për Kosovën dhe kauzën për të mbijetuarit e dhunës seksuale gjatë luftës.

    Më 16.01.2025,  Rushti njoftoi se së bashku me Qendrën Kosovare për Rehabilitimin e Viktimave të Torturës (QKRMT) është nominuar nga deputeti i Parlamentit suedez,  Magnus Jacobsson, për çmimin Nobel për Paqe për vitin 2025.

    Rushiti tha gjatë konferencës për media më 17.01.2025 se ky nominim është një vlerësim për punën 25-vjeçare që ka bërë QKRMT-ja për kauzën, konkretisht për rehabilitimin e të mbijetuarave të dhunës seksuale gjatë luftës, por edhe një vlerësim që i bëhet Kosovës. Ajo tha se ky nominim do të fuqizojë zërin e viktimave të dhunës seksuale.

    Ndërkaq në një bisedë për KALLXO.com, deputeti suedez Magnus Jacobsson tha se gjatë një vizite që kishte pasur në Kosovës në vitin 2022, kishte parë edhe punën e mirë që po bënte QKRMT-ja për rehabilitimin e të mbijetuarave të dhunës seksuale gjatë luftës.

    “Shpresoj që çmimi Nobel për Paqe, i cili shpesh shkon për OJQ-të të cilat punojnë për këto lloj çështjesh dhe mendoj që situata historike në Ballkan por po ashtu edhe realiteti që akoma nuk kemi atë që ne në Skandinavi e quajmë “Paqe të ngrohtë”, kur ka paqe me marrëdhënie të mira. Akoma është një situatë që ka paqe por jo marrëdhënie të mira. Shpresoj të ngris situatën dhe po ashtu të theksohet se sa është e rëndësishme të shohim situatën e grave në luftë. Mendoj që janë një organizatë shumë e mirë dhe shpresoj që Komiteti i Çmimit Nobel për Paqe do të vazhdojë me sugjerimin tim”- tha ndër të tjerash deputeti sudez në një bisedë për KALLXO.com më 17.01.2025.

    Çmimi Nobel për Paqe zakonisht bëhet i ditur në muajin tetor të çdo viti.