Ballina

Autor: Arjana Berisha

  • PDK gjobitet me 8 mijë euro, dy deputete publikuan video të realizuara në hapësirat e Kuvendit

    Paneli Zgjedhor për Ankesa dhe Parashtresa ka pranuar dy ankesa nga Lëvizja Vetëvendosje ndaj Partisë Demokratike të Kosovës, pas të cilave PZAP ka dënuar PDK-në me 8 mijë euro gjobë.

    Ankesa e LVV-së ishte se kandidatja e PDK-së për deputete, Blerta Deliu-Kodra, ka postuar në llogarinë e saj në Facebook një video me tekst shoqërues, të realizuar në hapësirën e brendshme të Kuvendit të Kosovës në kundërshtim me dispozitat e Ligjit për Zgjedhjet.

    Për këtë rast, PZAP ka pranuar ankesën e LVV-së dhe ka gjobitur PDK-në me 4 mijë euro.

    Partia Demokratike e Kosovës, e gjobitur në këtë rast, ka kundërshtuar ankesën duke thënë se kandidatja për deputete Blerta Deliu-Kodra këtë video e ka realizuar dhe publikuar më 13.12.2024, respektivisht një ditë pas publikimit të listave për deputetë të subjekteve politike, i cili veprim sipas PDK-së në asnjë mënyrë nuk përbën shkelje.

    Po ashtu, LVV është ankuar për të njëjtën arsye edhe për kandidaten për deputete Ariana Musliu-Shoshi.

    Edhe për rastin e deputetes Musliu-Shoshi, PZAP e ka gjobitur PDK-në me 4 mijë euro

    Lidhur me ketë rast, Partia Demokratike e Kosovës ka kërkuar nga PZAP që ankesën ta refuzojë si të pabazuar me pretendimin se deputetja Ariana Musliu-Shoshi këtë fotografi/video e ka realizuar në ambientet e jashtme të Kuvendit të Republikës së Kosovës.

    “Për me tepër, fotografia/video e Ariana Musliu Shoshi është realizuar shumë kohë me parë (më datë 31 dhietor 2024 dhe kjo mund te dëshmohet nga kamerat e sigurisë se Kuvendit) dhe jo pas fillimit të fushatës zgjedhore, respektivisht me date 17 janar 2025, sic pretendohet nga ana e ankuesit”- thuhet në përgjigjen e PDK për PZAP.

    PDK ka afat prej 15 ditësh që t’i paguajë gjobat.

  • LVV gjobitet 3,500 euro për deklaratën e Kurtit për LDK-në

    Paneli Zgjedhor për Ankesa dhe Parashtresa (PZAP) ka dënuar me 3,500 euro Lëvizjen Vetëvendosje pas ankesës së Lidhjes Demokratike të Kosovës me pretendimin se kryetari i LVV -së, Albin Kurti, ka shkelur Kodin për Mirësjellje.

    Ankesa e LDK-së ishte për deklarimet e Kurtit me fjalët “LYDYKYHI, Lidhja Demokratike e Kosovës nuk është Lidhje, por është lodhje, dhe nuk është demokratike por është dokrratike. E në përgjithësi, me nder me thanë, opozita po i japin zor mule anej mule knej për vend të dytë, po get e kanë pa edhe ata vetë që s’ka ymyt, se qashtu qysh Shpejtimi i ka myt, Vetëvendosja po i myt cep më cep në Republikën e Kosovës”.

    Këtë deklaratë Kurti e ka bërë më 15.01.2025 në një tubim elektoral në qytetin e Podujevës.

    Për këtë rast, PZAP ka pranuar ankesën e LDK-së dhe ka gjobitur LVV-në me 3,500 euro.

    Sipas vendimit, LVV-ja ka afat prej 15 ditësh që ta paguajë gjobën.

    Lëvizja Vetëvendosje, e gjobitur në këtë rast, ka kundërshtuar ankesën duke thënë se kjo bën pjesë në suazat e humorit dhe nuk gjen mbështetje në nenin e referuar.

    Më 20.01.2025, PZAP ka pranuar edhe një tjetër ankesë ndaj Lëvizjes Vetëvendosje duke e dënuar me 3,500 euro.

    Sipas PZAP, Lidhja Demokratike e Kosovës pretendon se LVV ka bërë shkelje të Rregullores Zgjedhore me rastin e vendosjes së posterit të kandidatit për deputet, Raif Qavolli, në hapësirat publike te stadiumi “Shahin Haxhiislami” në Pejë.

    Lëvizja Vetëvendosje, e gjobitur në këtë rast, ka kundërshtuar ankesën duke thënë se kandidati i tyre ka pasur një marrëveshje valide me gojë të cilën e ka lidhur në mirëbesim me ofruesin e shërbimeve, ku si detyrim ka qenë pagesa e një shume të caktuar në bazë të marrëveshjes.

    “Po ashtu në përgjigje theksohet edhe se hapësira nga e cila janë të drejtuara këto reklama është jashtë kufirit të stadiumit “Shahin Haxhislami”, çka nuk e bën përgjegjës kandidatin tonë për akuza se ka vendosur poster në pronën publike, ashtu siç e ndalon ligi shfrytëzimin e saj për qëllime të fushatës”- thuhet në përgjigjen e LVV për PZAP.

    Vendimin e plotë të PZAP-së mund ta shihni në këtë LINK.

  • Osmani viziton familjen e ish-Presidentit Rugova

    Presidentja e Kosovës, Vjosa Osmani më 21.01.2025 ka vizituar familjen e ish-presidentit Ibrahim Rugova, në 19-vjetorin e vdekjes së tij.

    Osmani ka thënë se kujtimi për presidentin historik, Ibrahim Rugova nuk është vetëm histori, por busulla nacionale.

    “Në përvjetorin e ndarjes së tij nga jeta, vizitova familjen e tij, në të cilën edhe më shumë e kuptojmë madhështinë dhe urtësinë me të cilën ai ndërtoi vizionin që na frymëzoi ne dhe do t’i frymëzojë brezat që vijnë për dashurinë e pakusht ndaj Kosovës.” – ka shkruar Osmani.

    Janë mbushur 19 vjet nga vdekja e ish-Presidentit Rugova.

    Në nderim të jetës dhe veprës së tij, më 21.01.2025, presidentja e Kosovës, Vjosa Osmani, së bashku me ambasadorët e akredituar në Kosovë kanë bërë homazhe te varri i tij, në Velani të Prishtinës.

    Pas homazheve, presidentja Osmani ka deklaruar se aleancat që i ka ndërtuar Rugova kanë ndihmuar në çlirimin dhe pavarësimin e vendit.

    “[Presidenti Rugova] dha një kontribut të jashtëzakonshëm në ndërtimin e themeleve të forta të shtetit tonë, në një kohë jashtëzakonisht të rëndë për popullin tonë, kur po rrezikohej edhe shfarosja e qytetarëve tanë, e popullit të Kosovës. Në atë kohë presidenti Rugova jo vetëm që bëri bashkë të gjithë qytetarët rreth kauzës për liri, pavarësi dhe demokraci, por njëkohësisht u bë zëri i Kosovës në botë duke ndërtuar aleanca të fuqishme të cilat na u deshtën më së shumti në ato kohë të vështira e të cilat rezultuan me intervenimin e NATO-s, i cili edhe e ndihmoi çlirimin e Kosovës. E, pastaj mbështetja e këtyre shteteve mike e ndihmoi edhe pavarësinë e shtetit tonë.” – u shpreh presidentja Osmani.

    Ibrahim Rugova u lind më 02.12.1944, në fshatin Cërcë të Komunës së Istogut.

    Ai ishte bashkëthemelues i LDK-së dhe Presidenti i parë i Kosovës.

    Rugova vdiq më 21.01.2006, pas një sëmundjeje.

  • Murati në Ferizaj: Qeveria Kurti e ka thyer rekordin e investimeve kapitale me 654 milionë euro në vitin 2024

    Lëvizja Vetëvendosje ka vazhduar fushatën për zgjedhjet e 09.02.2025 me një tubim elektoral në Ferizaj më 19.01.2025.

    Kandidati për deputet, Hekuran Murati, ka thënë se me Qeverinë Kurti për herë të parë në historinë e vendit ka pasur mbështetje për bizneset prodhuese duke ua subvencionuar kreditë investuese deri në 20 për qind.

    Ndërsa, ka thënë se Qeveria Kurti e ka thyer rekordin e investimeve kapitale me 654 milionë euro në vitin 2024.

    “Për herë të parë në historinë e vendit ka patur mbështetje për bizneset prodhuese, duke ua subvencionuar kreditë investuese deri në 20 për qind, ku vetëm në Ferizaj janë 71 biznese që janë mbështetë me 2.7 milionë euro për të investuar në kapacitete prodhuese… Ka qenë Qeveria Kurti ajo që e ka thy rekordin e investimeve kapitale me 654 milionë euro në vitin 2024, po për më tepër edhe e ka ulur borxhin e faturave të papaguara ndaj bizneseve nga 140 milionë në vetëm 30 milionë euro, pra kështu mbështeten bizneset”- ka thënë ai.

    Ndërsa, kandidati i LVV-së për kryeministër, Albin Kurti, ka folur për sistemin e drejtësisë në Kosovë.

    Sipas Kurtit, qytetari i thjeshtë i vendit pret me vite e vite për një lëndë që mrizon nëpër sirtarët e gjykatave dhe nuk i vjen asnjëherë rendi për adresim e trajtim.

    “Ndërkaq krimineli i cili arrestohet në veri të Kosovës, lirohet brenda pak ditëve nëse nuk ia kanë heqë urdhërarrestin paraprakisht sepse për këtë punë po gjejnë kollaj e shpejtë shumë kohë. Prandaj kjo gjë të dashur ferizajli nuk durohet më dhe duhet të marrë fund. Për të marrë fund padrejtësia, për të ardhë drejtësia e re, garancia jeni ju, mundësia jemi ne, shansi është 9 shkurti e numri është 118”- është shprehur Kurti.

    Fjalën e radhës e pati kandidatja për deputete, Albulena Haxhiu, e cila tha se “Reforma në drejtësi dhe ligji për Byronë për Konfiskimin e Pasurisë së Pajustifikueshme është bërë kërcënim për opozitën”.

    Lëvizja Vetëvendosje më 19.01.2025 ka mbajtur tubim edhe në Shtime.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.

  • Daut Haradinaj në Skenderaj: Kur u bashkuan Drenica dhe Dukagjini e larguan Serbinë nga këtu

    Aleanca për Ardhmërinë e Kosovës bashkë me partnerët e saj të koalicionit, Nismën Socialdemokrate, Konservatorët, Forumin Intelektual E-30, e ka vazhduar fushatën për zgjedhjet e 9 shkurtit 2025 me tubim në Skenderaj më 19.01.2025.

    Kandidati për deputet i AAK-së, Daut Haradinaj, ka thënë se kur u bashkuan Drenica dhe Dukagjini e larguan Serbinë nga Kosova. “Sot jemi bashkuar për ta bërë Kosovën anëtare të NATO-s” – ka shtuar ai.

    “Skënderaj ja din rëndësinë sigurisë së Kosovës, dha gjithçka çka kishte për lirinë saj. Skënderaj me Gjeneral Nuredinin dhe Gjeneral Kodrën, sot i dhanë besën Koalicionit për Kosovën Fituese, sepse vetëm përmes kësaj liste dalim ballëhapur para qytetarëve tanë duke ju dhënë siguri, mirëqenie dhe integrim”- ka shkruar ai.

    Ndërsa ka thënë se koalicioni është krijuar mbi parimin e bashkimit për fitoren e Kosovës.

    Ndërsa, kandidati për deputet, Nuredin Lushtaku, ka thënë se ky tubim ka dëshmuar se bashkimi i një populli nuk ndalet nga asgjë.

    “Ky nuk ishte vetëm një tubim – ishte një mesazh i fuqishëm që shpresa dhe guximi janë forca jonë më e madhe. 137 është më shumë se një numër; është sinjali i një epoke të re, i një udhëheqjeje që mendon për qytetarin, për të drejtën, për fitore të përbashkët”- ka thënë ai.

    Lushtaku ka thënë se do ta ndërtojnë një Kosovë ku askush nuk mbetet prapa dhe të gjithë jetojnë me dinjitet.

    Fushata pёr zgjedhjet parlamentare nё Kosovё ka filluar zyrtarisht mё 11.01.2025.

    Për njё muaj, partitë politike pritet të mbajnë tubime elektorale me qytetarët, për të fituar besimin e tyre në garën për zgjedhjet parlamentare të 09.02.2025.

    Për këto zgjedhje janë certifikuar 28 subjekte politike, me 1,280 kandidatë.

    Sipas Ligjit, gjatë periudhës së fushatës zgjedhore subjektet politike kanë të drejtë:

    – të organizojnë dhe të mbajnë tubime/ngjarje politike, tryeza të rrumbullakëta, konferenca për shtyp, fjalime, ose ndonjë aktivitet tjetër të ngjashëm, përmes së cilave ata mund t’i shprehin lirisht mendimet e tyre – me qëllim të fitimit të përkrahjes nga votuesit e tyre;

    – të publikojnë dhe të shpërndajnë afishe, reklama dhe material tjetër lidhur me një fushatë zgjedhore; të bëjnë fushatë përmes cilitdo operator televiziv, të radios apo kabllor, gjithashtu edhe përmes revistave, shtypit, rrjetit telefonik, sistemit postar ose çdo lloj mjeti tjetër reklamues – në pajtim me rregullat e KQZ-së dhe ligjet tjera në fuqi.

    Këto do të jenë zgjedhjet e para të rregullta që Kosova mban që nga shpallja e Pavarësisë më 2008.