Ballina

Autor: Arbrita Uka

  • Zgjedhja e kryetarit të ri të KPM-së, AGK: Përpjekje e hapur për politizim

    Asociacioni i Gazetarëve të Kosovës (AGK) është shprehur i shqetësuar me procesin e zgjedhjes së kryetarit të ri të Komisionit të Pavarur të Medieve (KPM), Besnik Berisha.

    Gjatë ditës, me katër vota për dhe një votë të pavlefshme, Besnik Berisha është zgjedhur kryetar i ri i Bordit të KPM-së.

    Berisha është zgjedhur kryetar disa ditë para skadimit të mandatit të kryetarit aktual të KPM-së, Jeton Mehmeti, më 20.01.2025.

    “Zgjedhja e Besnik Berishës për kryetar të KPM-së ngre pikëpyetje ligjore për mënyrën e ndryshimit të Rregullores së KPM-së, e cila parasheh që kryetari i ri zgjidhet në mbledhjen e parë pasi t’i ketë skaduar mandati ose të jetë shkarkuar kryetari aktual” – ka shkruar AGK në Facebook, më 17.01.2025.

    Sipas AGK-së, votimi i sotëm shihet si përpjekje e hapur për politizimin dhe instrumentalizimin e KPM-së për interesa të partisë në pushtet, Lëvizjes Vetëvendosje duke u bazuar në qëndrimet publike të iniciatorëve për ndryshimet e sotme.

    “Komisioni i Pavarur i Medieve, si organ kushtetues, luan rol të rëndësishëm në rregullimin e skenës mediale në Kosovë dhe, si i tillë, duhet ta ruajë pavarësinë e plotë dhe të mos lejojë ndërhyrjet politike” – ka theksuar AGK.

    Në mbledhjen e KPM-së të premten, më 17.01.2025, tashmë ish-kryetar i Komisionit Jeton Mehmeti ka treguar rezultatin e votave që mori Berisha.

    “Kanë votuar pesë anëtarët prezentë në këtë mbledhje. Me katër vota për është zgjedhur Besnik Berisha. Duke u thirrur në ligjin për KPM dhe në bazë të interpretimit të kryeshefit, Besnik Berisha zgjedhet kryetar i KPM-së”- ka thënë Mehmeti.


    Ushtruesi i detyrës së kryeshefit ekzekutiv, Niman Racaj tha se sipas rregullores Mehmeti duhet të mbaj pozitën e kryetarit të KPM-së pasi që sipas rregullores së miratuar, kryetari i ri merr detyrën pas përfundimit të mandatit.

    “Kryetar rregullorja është që kryetari i ri zgjedhet, nis punën nga dita kur kryetarit i skadon mandatit”- tha Racaj.

    Diskutime se kur Berisha nis detyrën e re pati pas përfundimit të votimit.

    “Askund nuk e tham që ti shkarkohesh apo mandati yt digjet. Ne nuk të kemi shkarkuar. Ne e kemi rastin më të mirë, rastin e Gjykatës Kushtetuese që zgjedhet kryetari më herët”- tha Besnik Berisha, kryetari i sapo zgjedhur i KPM-së.

    “Unë nuk kam siguri që pas zgjedhjes, ligji është më i qartë se rregullorja. Unë nuk mundem me vazhdu në këtë gjendje, unë mund vetëm me ta kalu drejtimin e seancës”- tha Jeton Mehmeti, kryetari aktual i KPM-së.

    Në mbledhjen e Komisionit të Pavarur për Media janë propozuar emrat për kryetar dhe nënkryetar të ri të këtij institucioni.

    Anëtari i KPM-së, Fitim Veliu propozoi që kryetar i KPM-së të jetë anëtari aktual, Besnik Berisha, ndërsa nënkryetare anëtarja tjetër, Luljeta Aliu.

    Propozimi i Berishës dhe Aliut erdhi pas ndryshimit të rregullores për punën e brendshme të KPM-së.

    Me tri vota për, një kundër nga kryetari aktual i KPM-së Jeton Mehmeti dhe një abstenim nga anëtari tjetër Fatih Basha, është votuar propozimi për plotësim ndryshimin e rregullores së punës së brendshme të KPM-së, e cila flet për zgjedhjen e kryetarit dhe nënkryetarit të ri të KPM-së.

    Në nenin 3 të kësaj rregullore të propozuar nga anëtari i KPM-së Besnik Berisha është shtuar paragrafi “përjashtimisht nga paragrafi 1 i nenit 3, zgjedhja e kryetarit, përkatësisht nënkryetarit mund të bëhet një muaj para skadimit të mandatit të kryetarit, përkatësisht nënkryetarit, veçanërisht për të siguruar që KPM nuk mbetet pa kryetar, përkatësisht nënkryetar në raste kur mund të mbetet pa kuorum për zgjedhjen e tyre”.

    Me të hapur mbledhjen e parë për këtë vit (17.01.2025), anëtarët e Komisionit të Pavarur të Mediave kanë shprehur shqetësim lidhur me siç i quajtën ‘lajmet  e rreme’ se anëtarët e KPM-së kanë planifikuar që ta shkarkojnë kryetarin e KPM-së, Jeton Mehmeti.

    Anëtari i KPM-së Besnik Berisha ka thënë se si pikë e rendit të ditës duhet të trajtohet tema për zgjedhjen e kryetarit të KPM-së me qëllim që mos ta lë komisionin pa kuorum.

  • Policia pajiset me kartela xhepi për trajtimin e rasteve që përfshijnë personat me aftësi të kufizuara

    Zyrtarët policorë janë pajisur me kartela xhepi, për qasje cilësore ndaj personave me aftësi të kufizuara.

    Kështu ka njoftuar Policia e Kosovës. Policia thotë se më 15.01.2025, përmes një ceremonie të veçantë i ka pranuar 8,000 kartela xhepi nga Misioni i OSBE-së në Kosovë.

    Kartelat janë ndarë në dy gjuhët zyrtare: shqip dhe serbisht, si dhe në gjuhën angleze – njofton Policia.

    “Kartelat janë ndarë në gjuhën shqipe (7000), serbe (1000) dhe angleze (40), të cilat do të shpërndahen te zyrtarët hetues, sektorial dhe reagues e do të (lehtësojnë) punën e PK-së në përmirësimin e shërbimeve ndaj komunitetit.” – ka njoftuar Policia, më 16.01.2025.

    Policia e Kosovës e sheh si hap të rëndësishëm këtë mundësi, për trajtimin e personave me aftësi të kufizuara nga ana e tyre.

    “(Kartelat) do të ndihmojnë zyrtarët policorë në trajtimin profesional të rasteve, që përfshijnë këtë kategori qytetarësh. Ky projekt u realizua falë bashkëpunimit me OSBE-në – duke forcuar përkushtimin e PK-së për profesionalizëm dhe gjithëpërfshirje në shërbimet ndaj qytetarëve.” – ka theksuar Policia.

  • Arsyetimi i MASHTI-t se pse nuk arriti t’i sigurojë karriget për objektin e ri të dy Shkollave në Ferizaj

    Pas raportimit të KALLXO.com se nxënësit e Gjimnazit “Shaban Hashani” dhe të Shkollës së Mjekësisë “Elena Gjika” në Ferizaj nuk e kanë filluar gjysmëvjetorin e dytë, Ministria e Arsimit është arsyetuar lidhur me mosfurnizimin me karrige të objektit të ri që është ndërtuar për këto dy Shkolla.

    Nxënësit e të dy Shkollave të Mesme që mësonin në objektin e ish-Shkollës Fillore “Gjon Serreçi” nuk e kanë filluar gjysmëvjetorin e dytë për shkak të disa problemeve që u kanë dalë me objektin e ri, i cili është ndërtuar te Salla e Sporteve “Bill Clinton”.

    Në mesin e problemeve që ka përmendur drejtori i Arsimit në Ferizaj, Afrim Llabjani është edhe furnizimi me banka shkollore dhe karrige të objektit të ri, të ndërtuar për të dy Shkollat e Mesme, që është pritur të bëhet nga Ministria e Arsimit.

    Ndonëse Llabjani ka thënë se para tre-katër javësh objekti i ri i të dy Shkollave të Mesme është furnizuar vetëm me banka shkollore nga Ministria e Arsimit, vetë Ministria ka thënë se e kanë furnizuar objektin me banka në muajin tetor 2024.

    “Objekti i ri i Shkollës është furnizuar me banka në muajin tetor 2024, me Kontratën që ka lidhur AQP (Agjencioni i Prokurimit Qendror), me afat deri në fund të muajit tetor.” – thuhet në përgjigjen e Ministrisë së Arsimit, më 14.01.2025.

    Sa i përket furnizimit me karrige, Llabjani ka thënë se Ministria e Arsimit është arsyetuar se nuk kanë qenë të kënaqur me cilësinë e karrigeve.

    Sipas Llabjanit, ata janë detyruar që t’i bartin karriget e komodinat e mëparshme, që i kanë shfrytëzuar të dy Shkollat tek objekti i ri.

    E Ministria e Arsimit po thotë se deri në fund të muajit janar objekti i ri i Gjimnazit “Shaban Hashani” dhe Shkollës së Mjekësisë “Elena Gjika” në Ferizaj do të furnizohet me karrige.

    Sipas Ministrisë, afati i Kontratës ekzistuese ka qenë deri në fund të muajit tetor dhe për shkak të importit të artikujve – karrigeve, kompania furnizuese nuk ka arritur të kryejë furnizimet brenda afatit ligjor të Kontratës.

    “Objekti i ri i Shkollës do të vazhdojë të furnizohet me karrige me Kontratën e re të lidhur nga AQP, furnizuesi i së cilës është në proces të sigurimit të artikujve për furnizim dhe pritet që deri në fund të muajit janar të kryhen furnizimet.” – ka thënë Ministria e Arsimit në përgjigjet e saj.

    Deri më tani, MASHTI thotë se ka paguar 33,444 euro për furnizimin me banka të objektit të ri, të të dy Shkollave të Mesme në Ferizaj, ndërsa ende nuk ka ekzekutuar pagesë për karrige dhe vetëm pas kryerjes së furnizimeve e pranimit nga Shkolla do të kryhet edhe kjo pagesë. 

    Kryetari i Këshillit të Prindërve të Gjimnazit “Shaban Hashani”, Besim Jashari ka thënë se mësimi nuk ka filluar për shkak se janë kthyer disa karrige që nuk kanë qenë të cilësisë së mirë e që i janë kushtuar objektit të ri të ndërtuar për Gjimnazin.

    “Kanë ardhë karriget me jokualitet edhe janë kthy karriget, për atë arsye kanë mbetë pa karrige, edhe nuk është fillu mësimi.” – ka thënë Jashari, më 13.01.2025.

    Për objektin e ish-Shkollës “Gjon Serreçi”, Jashari tha se nuk ka objekt më të papërshtatshëm për të qëndruar në të, e jo të zhvillohet mësim aty.

    Sipas Jasharit, nxënësit e Gjimnazit “Shaban Hashani” një orë mësimi e kanë zhvilluar 30 minuta, në objektin e vjetër të ish-Shkollës “Gjon Serreçi”, për shkak të kushteve të saj.

    Kurse drejtoresha e Gjimnazit “Shaban Hashani”, Hajrije Nebihu ka thënë se nuk e kanë nisur gjysmëvjetorin e dytë, pasi nuk janë kryer disa detaje të vogla tek objekti i ri i ndërtuar.

    “Do izolime të vogla rreth dritareve që ka ftoftë, këto na kanë pengu, edhe bash sot kem me pastru. Karriga e banka i kemi mbushë klasat.” – ka thënë Nebihu.

    Nebihu ka treguar se objekti i ri i Gjimnazit “Shaban Hashani” ka filluar të ndërtohet rreth katër vjet e gjysmë më parë.

    KALLXO.com e kishte vizituar Gjimnazin “Shaban Hashani” në tetor të vitit 2023. Në atë kohë, muret në pamjen e jashtme të Shkollës ishin të dëmtuara; dritaret në klasa e tualetet e Shkollës në gjendje jo të mirë. 

    E zëvendësdrejtori i Shkollës së Mjekësisë “Elena Gjika” në Ferizaj, Bardhyl Xheladini nuk ka pranuar të japë shumë detaje, por ka kërkuar që për këtë çështje të pyetet Drejtoria e Arsimit.

    Sipas Xheladinit, ata nuk e dinë se kur do ta fillojnë mësimin nxënësit e Shkollës së Mjekësisë në Ferizaj.

    Drejtori i Arsimit në Ferizaj, Afrim Llabjani ka thënë se u kanë dalë telashe me kulm të objektit të ri, që është ndërtuar për të dy Shkollat e Mesme.

    “Ka piku kulmi, edhe kena pasë pak problem me ujë edhe me energji elektrike. Sidomos me ujë, kur e kemi lëshu, ka pasë ngapak do rrjedhje.” – ka deklaruar Llabjani.

    Llabjani ka thënë se po përpiqen që nxënësit e të dy Shkollave ta fillojnë mësimin më 20.01.2025, ndërsa gjysmëvjetori i dytë i vitit shkollor 2024/2025 ka nisur në Kosovë më 08.01.2025.

    Kur është pyetur se si ka pasur problem me kulmin objekti i ri që është ndërtuar, ai ka shpjeguar se problemi ka qenë te ndërtimi i kullueseve të kulmit.

    Ndërtimi i objektit të ri të Gjimnazit “Shaban Hashani” dhe Shkollës së Mjekësisë “Elena Gjika” i ka kushtuar Komunës së Ferizajt rreth një milion e 200 mijë euro – sipas Llabjanit.

    Lokacioni ku është ndërtuar objekti i ri, Llabjani ka shpjeguar se ka qenë i AKP-së, e cila për dy vjet ua ka ndalur punimet, e ato kanë filluar në vitin 2019 deri më 2021.

  • Dorëzohet në Polici i dyshuari për gjuajtjen me armë, në Prishtinë, në shtator të 2024-tës

    Policia e Kosovës ka njoftuar se është vetëdorëzuar i dyshuari që ishte në arrati për gjuajtjen me armë zjarri që ka ndodhur më 03.09.2024, në lagjen “Aktash”, në Prishtinë.

    Lajmin për KALLXO.com e ka konfirmuar zëdhënësja e Policisë së Kosovës për Rajonin e Prishtinës, Flora Ahmeti.

    Policia njofton se i dyshuari e ka dorëzuar pistoletën, me të cilën dyshohet se është kryer vepra.

    “I dyshuari pas intervistimit në prani të avokatit, me vendim të Prokurorit, është dërguar në mbajtje.” – thuhet në njoftimin e Policisë, më 15.01.2025.

    Rasti kishte ndodhur rreth orës 14:19, në rrugën “Gazmend Zajmi”, në Kryeqytet.

    KALLXO.com kishte marrë vesh jo zyrtarisht se ngjarja lidhej me një përleshje mes dy personave për çështje të trafikut, e pastaj është shkrepur edhe arma.

    Në pamjet e KALLXO.com të raportuara në shtator 2024 nga vendi i ngjarjes shihet edhe një gëzhojë plumbi.

  • Gjashtë raste ‘armëmbajtje pa leje’ të trajtuara në Polici, prej tyre katër të arrestuar

    Gjashtë raste të trajtuara si “armëmbajtje pa leje” janë regjistruar në Raportin e Policisë së Kosovës, gjatë 24 orëve të fundit. Prej këtyre rasteve, katër persona kanë përfunduar të arrestuar.

    Në Podujevë, Policia ka arrestuar një të dyshuar, pasi kishte ekspozuar në rrjete sociale një fotografi me armë.

    Sipas njoftimit të Policisë rasti ka ndodhur më 31.12.2024, kurse i dyshuari është arrestuar më 14.01.2025.

    “Gjatë kontrollit në shtëpinë e të dyshuarit është sekuestruar një pushkë me karikator pa fishekë. I dyshuari pas intervistimit, me vendim të Prokurorit, është liruar në procedurë të rregullt.” – njofton Policia, më 15.01.2025.

    Policia në Fushë Kosovë është informuar se një person posedon dy thika. Rasti ka ndodhur më 14.01.2025, rreth orës 15:45.

    Policia thotë se palët janë intervistuar dhe, me vendim të Prokurorit, janë liruar në procedurë të rregullt.

    Kurse, në Graçanicë Policia ka gjetur dhe konfiskuar një pistoletë me pesë copë fishekë në automjetin e një të dyshuari. Sipas Policisë, rasti ka ndodhur më 14.01.2025, rreth orës 13:20.

    “I dyshuari është intervistuar dhe, me vendim të Prokurorit, është arrestuar dhe dërguar në mbajtje. Rasti nën hetime.” – ka njoftuar Policia.

    Në Pejë, pas disa të shtënave me armë zjarri një i dyshuar është vërejtur në ballkon të banesës kolektive, duke ekspozuar armën.

    Ky rast ka ndodhur më 14.01.2025, rreth orës 21:42. I dyshuari – sipas Policisë – në fillim ka refuzuar t’u bindet urdhrave të policëve dhe u është drejtuar me kanosje.

    “Më vonë i njëjti është qetësuar dhe arrestuar. Gjatë kontrollit në banesën e tij janë gjetur dhe konfiskuar: 1 (një) pushkë automatike, 1 (një) pistoletë, 2 (dy) karikatorë, 71 (shtatëdhjetë e një) copë fishekë, 5 (pesë) gëzhoja dhe një thikë-bajonetë.” – ka thënë Policia.

    Pasi është intervistuar nga Policia, i dyshuari, me vendim të Prokurorit, është dërguar në mbajtje, ndërsa rasti është trajtuar si ‘armëmbajtje pa leje’ dhe ‘përdorim i armës’.

    Në Gjakovë, në veturën e një të dyshuari Policia ka gjetur dhe konfiskuar një sprej.

    Sipas Policisë, rasti ka ndodhur në rrugën “Gasper Karaqi”, më 14.01.2025, rreth orës 18:40.

    Policia e ka intervistuar të dyshuarin dhe, me vendim të Prokurorit, e ka liruar në procedurë të rregullt, kurse rasti është trajtuar si ‘armëmbajtje pa leje’.

    Për një rast tjetër që ka ndodhur në Prishtinë, më 03.09.2024, Policia ka njoftuar se i dyshuari është vetëdorëzuar dhe e ka dorëzuar edhe pistoletën me të cilën dyshohet se është kryer vepra.

    “I dyshuari pas intervistimit në prani të avokatit, me vendim të Prokurorit është dërguar në mbajtje.” – ka thënë Policia.