Ballina

Autor: Antigonë Isufi

  • Kurti nuk sheh mundësi për koalicion me PDK-në, LDK-në e AAK-në, i quan “të pareformuara”

    Pak ditë para së të nisë fushata zgjedhore kryeministri i Kosovës, Albin Kurti ka thënë se nuk sheh mundësi për koalicione paszgjedhore. Ai përjashtoi mundësinë që të bëjë koalicion me PDK-në, AAK-në e LDK-në, duke i quajtur ato të pareformuara.

    Kurti, njëherësh kryetar i Lëvizjes Vetëvendosje, thotë se mu për këtë arsye i kanë bërë koalicionet parazgjedhore me partinë Guxo dhe atë Alternativa.

    Sipas Kurtit, me këto dy subjekte politike kanë bashkëqeverisur katër vjet mandat dhe kanë përvoja të mira me njëra-tjetrën.

    Për AAK-në, LDK-në dhe PDK–në, Kurti tha se nuk kanë parë që janë reformuar këto katër vjet dhe se muajt e fundit e kanë sulmuar qeverisjen e tij.

    “Kur e kemi parasysh se sidomos në muajt e fundit sulmet që janë bërë ndaj subjektit tonë, ndaj qeverisjes së mirë dhe demokratike nuk shohim mundësi që të kemi çfarëdo koalicioni në mandatin tjetër, për më tepër që nuk do të jetë as i nevojshëm.” – tha Kurti në një intervistë për KosovaPress, më 06.01.2025.

    Duke synuar 500 mijë vota Kurti tha se presin që të tejkalojnë rezultatin e vitit 2021, për shkak se para katër vjetëve i kishin grumbulluar 438 mijë vota.

    “Unë besoj që janë pretendime reale. Ma merr mendja që një numër i konsiderueshëm i tyre nuk kanë besuar që do të jemi mbi 50% më 14 shkurt 2021, që ju duket joreal që ne të kemi 500 mijë vota në vitin 2025.” – shtoi ai.

    Përmes shortit në Zgjedhjet e 9 shkurtit 2025 Lëvizja Vetëvendosje (LVV) do të ketë numrin 118.

    KQZ-ja e ka certifikuar më 04.01.2025 listën përfundimtare të votuesve brenda dhe jashtë Kosovës dhe ka bërë të ditur se 2 milionë e 75 mijë e 868 votues do të kenë të drejtë vote në Zgjedhjet e rregullta parlamentare më 9 shkurt.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

    Sipas Vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

    Në total, në Zgjedhjet e 9 shkurtit 2025 do të garojnë 27 parti politike.

    Prej tyre 19 janë parti politike, pesë koalicione, dy nisma qytetare dhe një kandidat i pavarur.

    Zgjedhjet parlamentare të 9 shkurtit 2025 përbëjnë procesin e parë të rregullt zgjedhor në Kosovë, pas shpalljes së pavarësisë më 2008.

  • Numrat e partive politike për Zgjedhjet e 9 shkurtit

    Janë përcaktuar numrat e partive politike që do të jenë pjesë e garës për Zgjedhjet e rregullta parlamentare, më 9 shkurt 2025.

    Përmes shortit në Zgjedhjet e 9 shkurtit Lëvizja Vetëvendosje (LVV) do të ketë numrin 118, Lidhja Demokratike e Kosovës (LDK) 124, Partia Demokratike e Kosovës (PDK) 131, ndërsa Koalicioni AAK-NISMA-Lista Konservatore me numër 137.

    Në dy vazo mbi tavolinë: u vendosën në njërën prej tyre subjektet politike e në tjetrën numri në fletëvotim për Zgjedhjet e përgjithshme dhe në mënyrë rastësore u tërhoq shorti.

    Secili përfaqësues i subjektit doli ta tërheqë numrin që qëlloi me short.

    Përfaqësuesit e Listës Serbe dhe Srbska Demokratka nuk morën pjesë në tërheqjen e shortit për Zgjedhjet e 9 shkurtit. Në mungesë të përfaqësuesve të tyre shorti u tërhoq nga Sekretariati i KQZ-së.

    Lista Serbe qëlloi e treta, por në mungesë të përfaqësueve të saj, numri u tërhoq nga anëtarët e KQZ-së. Numri i kësaj partie doli të jetë 112.

    Renditja:

    Lëvizja Vetëvendosje  (LVV) me numër 118;

    Lidhja Demokratike e Kosovës (LDK) – 124;

    Partia Demokratike e Kosovës (PDK) – 131;

    Koalicioni AAK-NISMA-Lista Konservatore – 137;

    Srpski Narodni Pokret – 133;

    Partia Liberale Egjiptiane (PLE) – 115;

    Opre Roma Kosova – 136;

    Koalicija Vakat – 135;

    Nova Demokratska Stranka – 119;

    Jedinstevna Goransla Partija – 113;

    Kosova Demokratik Turk Partisi – 134;

    Socialdemokratska Unija- SDU – 127;

    Za Slobodu Pravdu Opstanak – 132;

    Kosova Adalet Turk Partisi – 122;

    Partia Fjala – 138;

    Koalicioni për Familjen – 129;

    Partia Balli Kombëtar Demokrat Shqiptar – 117;

    Iniciativa e Re Demokratike e Kosovës – 111;

    Kandidati i pavarur Fatmir Bytyçi – 128;

    Partija Kosovskih Srba – 120;

    Partia e Ashkalinjve për Integrim – 123;

    Srbska Demokratka – 116;

    Lista Serbe – 112;

    Partia Rome e Bashkuar e Kosovës -114

    Nasa Bosnjacka Koalicija -121

    PDAK-LPB -125

    Gradjanska inicijativa Narodna Pravda -126

    Shorti për caktimin e numrave të partive politike për Zgjedhjet e 9 shkurtit | Foto: Kallxo.com

    Kreshnik Radoniqi, kryetar i Komisionit Qendror Zgjedhor (KQZ), tregoi që nga mesi i muajit gusht kanë nisur aktivitetet për organizimin e Zgjedhjeve të 9 shkurtit.

    KQZ e ka certifikuar më 04.01.2025 listën përfundimtare të votuesve brenda dhe jashtë Kosovës dhe ka bërë të ditur se 2 milionë e 75 mijë e 868 votues do të kenë të drejtë vote në Zgjedhjet e rregullta parlamentare më 9 shkurt.

    Sipas të dhënave të KQZ-së, numri i qytetarëve me të drejtë vote në vendvotime në Kosovë është 1 milion e 970 mijë e 944 votues, ndërkaq numri i qytetarëve të cilët janë regjistruar për të votuar jashtë Kosovës është 104 mijë e 924 votues.

    Sipas vendimit të fundit të KQZ-së, procesi i votimit do të zhvillohet në 17 Ambasada dhe 15 Konsullata, në 19 shtete të ndryshme të botës.

    Në total, në Zgjedhjet e 9 shkurtit 2025 do të garojnë 27 parti politike.

    Prej tyre 19 janë parti politike, pesë koalicione, dy nisma qytetare dhe një kandidat i pavarur.

    Zgjedhjet parlamentare të 9 shkurtit 2025 përbëjnë procesin e parë të rregullt zgjedhor në Kosovë, pas shpalljes së pavarësisë më 2008.

    Shënim: Artikulli është edituar më 06.01.2025, ora 14:35.

  • Plani i tranzicionit të FSK-së: Nis gjenerimi i opsioneve për ndërtimin e flotës ajrore

    Ministria e Mbrojtjes thotë se ka filluar me gjenerimin e opsioneve për ndërtimin e flotës ajrore.

    Në një përgjigje për KALLXO.com, kjo Ministri deklaroi se një gjë e tillë ka ndodhur sipas Planit Gjithëpërfshirës të Tranzicionit.

    Megjithatë, në këtë fazë, nga Ministria nuk kanë pranuar të ndajnë më shumë detaje.

    “Sipas Planit Gjithëpërfshirës të Tranzicionit këtë vit fillon faza e tretë, ajo e ndërtimit të kapaciteteve të flotës ajrore dhe në përputhje me këtë Plan kemi filluar me gjenerimin e opsioneve. Që në këtë fazë detajet nuk mund t’i ndajmë me publikun.” – tha këshilltarja për media e ministrit të Mbrojtjes, Ejup Maqedonci.

    Procesi i transformimit të Forcës së Sigurisë së Kosovës (FSK) në forcë me kapacitete ushtarake ka hyrë në vitin e shtatë të Planit dhjetëvjeçar.

    Procesi i transformimit të FSK-së në Forcat e Armatosura të Kosovës nisi në dhjetor të vitit 2018, kur Kuvendi i Kosovës miratoi ndryshimet ligjore për ta ndryshuar mandatin e FSK-së. Ky proces pritet të zgjasë dhjetë vjet, deri në vitin 2028.

    Buxheti i Ministrisë së Mbrojtjes, e cila po ashtu ka nën menaxhim Forcën e Sigurisë së Kosovës, është rritur dukshëm nga viti në vit. Për vitin 2025 ka një rritje prej 55 milionë euro më shumë, krahasuar me vitin e kaluar.

    Për sivjet, janë projektuar 208 milionë buxhet për këtë Ministri. Ndërsa, për vitin 2024 ishin ndarë gjithsej 153 milionë euro.

    Përndryshe, në vitin 2024 buxheti i tërësishëm i Kosovës ishte 3 miliardë e 314 euro, kurse 3 miliardë e 212 milionë euro në vitin 2023. Ndryshe prej rritjes 100 milionëshe që ndodhi në vitin 2024, rritja për vitin 2025 do të jetë 294.

    Kryeministri i Kosovës, Albin Kurti më 27.11.2024 në Ditën e Forcës ka nënshkruar Vendimin për Themelimin e Komisionit Ndërministror për qëllim të vlerësimit dhe nisjen e procedurave dhe negociatave lidhur me hapjen e fabrikës së municionit dhe për laboratorët për dizajnimin e fluturakeve pa pilotë.

    “Një Ushtri që për një kohë aq të shkurtër është armatosur kaq shumë sa kjo e jona, ka nevojë për ta siguruar dhe garantuar operancionalitetin e plotë dhe qëndrueshmërinë tërësore. Andaj, me sot hedhim hapat e parë për ngritjen e industrisë ushtarake.” – ka thënë Kurti.

    Bazuar në zotimin e vitit 2013, të nënshkruar mes institucioneve të Kosovës dhe NATO-s, ish-kryeministri Hashim Thaçi e kishte siguruar NATO-n se FSK-ja nuk do të shkojë në Veri – pa pëlqimin paraprak të KFOR-it.

    Për këtë zotim ka reaguar disa herë kryeministri aktual Albin Kurti, megjithëse edhe ai i është përmbajtur së njëjtës ujdi deri më tani.

  • Raportohet për gjuajtje me armë në Veternik, thyhet xhami i një lokali

    Në një lokal në Veternik të Prishtinës xhami i katit të tretë është thyer si pasojë e gjuajtjes me armë zjarri.

    Kështu ka njoftuar Policia e Kosovës në Raportin 24 orësh – pas raportimit të një qytetari. 

    “Sipas ankuesit, predha ka thyer xhamin dhe ka depërtuar brenda objektit.” – njofton Policia.

    Rasti ka ndodhur më 05.01.2025, në orën 17:30 dhe Policia po heton rrethanat. 

    Vepra është cilësuar si “përdorim i armës apo mjetit të rrezikshëm”.

  • I tërhoqën vërejtje për zhurmën në banesë, qytetari dyshohet se sulmoi zyrtarët policorë

    Një person është arrestuar në Fushë Kosovë, nën dyshimin se ka sulmuar tre zyrtarë policorë.

    Policia e Kosovës ka bërë të ditur se i dyshuari ka sulmuar zyrtarët policorë, të cilët kishin shkuar në banesën e tij për t’i tërhequr vërejtjen për zhurmë të madhe. 

    Rasti ka ndodhur në rrugën “Hajrullah Zymi”, në Fushë Kosovë, më 05.01.2025, në orën 02:23 – sipas Raportit 24 orësh.

    “Tre zyrtarë policorë kanë pësuar lëndime dhe kanë pranuar tretman mjekësor.” – njofton Policia.

    Me vendim të Prokurorit, i dyshuari është dërguar në mbajtje. 

    Rasti është cilësuar vepër penale “sulm ndaj personit zyrtar”.