Ballina

Autor: Adelina Ahmeti

  • IPK rekomandon suspendimin e policit i cili dyshohet se shkaktoi aksidentin me fatalitet në Çubrel

    Inspektorati Policor i Kosovës i ka rekomanduar Policisë së Kosovës që ta suspendojë zyrtarin policor i cili dyshohet se shkaktoi aksidentin me fatalitet në Çubrel të Skenderajt, të dielën në mbrëmje, më 26.01.2025, nga i cili vdiqën tre persona.

    Rekomandimi i IPK-së u bë si pjesë e procedurave administrative dhe në interes të hetimit në lidhje me aksidentin me fatalitet i cili u regjistrua në rrugën Mitrovicë-Pejë, më saktësisht në fshatin Çubrel.

    KALLXO.com mëson se në veturën e Policisë e cila u aksidentua me një veturë civile ishin katër zyrtarë policorë të Njësisë Speciale Kufitare.

    Të njëjtit në kohën e aksidentit ishin duke u kthyer nga puna në drejtim të Pejës.

    Në aksidentin që ndodhi më 26.01.2025 vdiqën tre persona, një burrë dhe dy gra.

    Sipas një hetimi preliminar dyshohet se aksidenti u shkaktua nga mospërshtatja e shpejtësisë së veturës së Policisë.

    Inspektorati Policor i Kosovës ka njoftuar se rreth orës 19:00 janë njoftuar nga Policia e Kosovës për një aksident trafiku, ku ishte përfshirë një automjet zyrtar i Policisë dhe një veturë civile.

    Pas pranimit të informacionit hetuesit e IPK-së kanë dalë në vendin e ngjarjes – duke iu bashkëngjitur edhe ekipeve tjera policore dhe Prokurorisë në këqyrjen e vendit të ngjarjes.

    “Bazuar në veprimet fillestare hetimore dyshohet se aksidenti ka ndodhur si rezultat i mospërshtatjes së shpejtësisë së lëvizjes së automjetit me kushtet e rrugës nga drejtuesi i automjetit zyrtar të Policisë, i cili  ka kaluar në shiritin e kundërt duke goditur veturën civile.” – thuhet në njoftimin e IPK-së.

    Si pasojë e aksidentit tre persona të cilët kanë qenë në veturën civile, një burrë dhe dy gra, kanë vdekur.

    Trupat e pajetë të tre viktimave janë dërguar në Institutin e Mjekësisë Ligjore për obduksion.

    Lëndime të rënda trupore kanë pësuar katër zyrtarë policorë dhe një qytetar nga vetura civile, të cilët janë dërguar në QKUK për tretman mjekësor.

    “Si pjesë e procedurave administrative dhe në interes të hetimit, IPK ka rekomanduar suspendimin e zyrtarit policor i cili ka qenë drejtues i automjetit zyrtar të Policisë në momentin e aksidentit, përderisa lidhur me aksidentin janë duke u ndërmarrë veprime hetimore në koordinim me Prokurorin kompetent.” – thuhet tutje në njoftimin e IPK-së.

    KALLXO.com raportoi në lidhje me aksidentin që u shënua mbrëmë, më 26.01.2025.

    https://kallxo.com/lajm/tre-te-vdekur-nga-aksidenti-ne-cubrel-te-skenderajt/

     

  • Zyrtari policor plagoset në një poligon qitjeje në rajonin e Gjilanit

    22:10 – Plagosja e policit, arrestohet instruktori i poligonit 

    Për rastin e plagosjes së një polici në rajonin e Gjilanit, është arrestuar edhe instruktori që punonte në poligon në momentin kur ndodhi incidenti.

    Këtë e ka konfirmuar Ismet Hashani zëdhënës i Policisë Rajonale të Gjilanit.

    I dyshuar për plagosjen e zyrtarit policor në një poligon në Pasjak të Novobërdës, është një i mitur.

    Të miturit dyshohet se i ka shkrepur arma aksidentalisht me ç’rast ka plagosur zyrtarin policor.

    I dyshuari është arrestuar dhe intervistuar në bazë të procedurave ligjore.

    I plagosur ka mbetur zyrtari policor E.Sh i lindur në vitin 2003.

    Njësia Rajonale po vazhdon hetimet për zbardhjen e rrethojave të rastit i cili është cilësuar “Plagosje”. Polici i plagosur vazhdon të trajtohet në QKUK.

    21:18 – Plagosja e policit në poligon, Policia jep detajet 

    Policia e Kosovës ka konfirmuar zyrtarisht rastin e plagosjes së një zyrtari policor në një poligon të qitjes në rajonin e Gjilanit.

    Ismet Hashani, zëdhënës i Policisë Rajonale të Gjilanit tka dhënë detaje se si ka ndodhur rasti.

    “Ju njoftojmë se sot mv datën 26.01.2025 rreth ores 19:12 në fshatin Pasjak – Novobërdë në poligonin e gjuajtjes ‘Target’, ka ndodhur një plagosje me armë zjarri. Në vendin e ngjarjes kanë dalë me urgjencë njësitet relevante. Nga hetimet e para mësohet se është plagosur zyrtari policor E. Sh. (2003) dhe i njëjti është transportuar për QKUK- Prishtinë” – deklaroi Hashani.

    Tutje Hashani thotë se deri tek rasti ka ardhur kur një personi që ishte në poligon me viktimën i shkrepet arma aksidentalisht.

    “I dyshimti i mitur është arrestuar me vendim të prokurorit të shtetit dhe është intervistuar në bazë të procedurave ligjore” – thotë Hashani.

    Njësia e hetimeve rajonale dhe Prokuroria po hetojnë rastin që të merren vesh të gjitha rrethanat e rastit.

    21:07 – Plagosja e zyrtarit policor – Policia e Kosovës në vendin e ngjarjes

    Plagosja e zyrtarit policor në poligonin e qitjes në dalje të Gjilanit – Policia e Kosovës në vendin e ngjarjes:

    20:54 – I mituri dyshohet për plagosjen e policit në një poligon qitjeje në Gjilan 

    KALLXO.com mëson se polici që ka mbetur i plagosur në një poligon qitjeje në Gjilan ka marrë plagë në zonën e nofullës.

    Policisë në vendin e ngjarjes i është bashkuar edhe Inspektorati Policor i Kosovës.

    Në bazë të burimeve të KALLXO.com, i dyshuar për plagosjen e policit është një person i mitur.

    Prokuroria pritet që të ndjekë penalisht edhe instruktorin e poligonit, për shkak se dyshohet që nuk ka qëndruar afër personit që po gjuante me armë zjarri.

    Pritet që Prokuroria të ndalojë të miturin e dyshuar dhe instruktorin e poligonit.

     

    20:44 – Plagosja e policit në Gjilan, flasin nga Emergjenca e QKUK-së

    Dejtori i Emergjencës në QKUK, Naser Syla ka konfirmuar për KALLXO.com se gjendja e policit që dyshohet se ka marrë plagë nga arma në Gjilan, është stabile.

    “Në gjendje stabile e kemi pranuar, është plagë me armë zjarri. Tani jemi dukë i bërë ekzaminimet e duhura” – ka deklaruar shkurtimisht Syla.

    20:41 – Dyshohet se i përfshirë në incidentin në Gjilan është edhe një i mitur 

    Në rastin e plagosjes që ka ndodhur në Pasjak të Gjilanit, dyshohet se i përfshirë është edhe një person i mitur.

    I mituri dyshohet se ka qenë i shoqëruar nga një person i moshës madhore.

    Në bazë të informatave të para që ka ekipi i KALLXO.com në vendin e ngjarjes, i mituri ka dashur të gjuajë, arma i është bllokuar dhe se kur instruktori i është afruar që t’i ndihmojë, i mituri ka ngrehur armën dhe dyshohet se ka qëlluar zyrtarin policor.

    20:37 – Plagosja e një zyrtari policor në Gjilan – Pamje nga vendi i ngjarjes

     

    20:21 – Dyshohet se një zyrtar policor ka marrë plagë nga arma e zjarrit në Gjilan 

    Një zyrtar policor dyshohet se ka marrë plagë nga arma e zjarrit në një poligon privat në dalje të Gjilanit.
    Zyrtari policor është dërguar për trajtim mjekësor në Prishtinë.

    I përfshirë në rast dyshohet të jetë edhe një qytetar.

    Arsyet që sollën plagosjen në Gjilan nuk dihen akoma.

    Ekipet e Policisë janë në vendin e ngjarjes derisa është lajmëruar edhe ekipi i Inspektoratit Policor të Kosovës dhe Prokuroria.
    KALLXO.com merr vesh se polici i cili ka mbetur i plagosur është graduar në gjeneratën e fundit të Policisë të cilët u diplomuan më 24.01.2025.

    20:18 – Vendi ku ka ndodhur incidenti me armë zjarri në Gjilan

     

    Një incident me armë zjarri ka ndodhur në një poligon në Gjilan.

    KALLXO.com merr vesh se janë njoftuar ekipet e Hetuesisë të cilët kanë dalur në vendin e ngjarjes.

    Ende nuk ka konfirmim për ndonjë të lënduar.

    Rasti dyshohet që ka ndodhur pak minuta para orës 20:00 të datës 26.01.2025.

    Ekipi i KALLXO.com është në vendin e ngjarjes.

    Lajm në zhvillim…

  • Vetura e një anëtareje të KQZ-së sulmohet me koktej mollotovi në Ranillug, prokurori jep detaje 

    Dy shishe koktej mollotovi dyshohet se janë hedhur në veturën e një përfaqësuesi të Komisionit Qëndror Zgjedhor. 

    Ngjarja ka ndodhur në orët e mbrëmjes së sontme (25.01.2025) në Ranillug. 

    KALLXO.com ka kontaktuar me prokurorin kujdestar Agron Uka, i cili ka dalë në vendin e ngjarjes. 

    Ai tha se ekipet e hetuesisë janë në vendin e ngjarjes pas informacioneve që kanë pranuar në lidhje me një zjarr fillimisht që ishte raportuar. 

    “Ajo çka kemi, është që dy shishe me koktej molotovi janë gjuajtur në drejtim të veturës së një anëtareje të KQZ-së. Ka mundësi që i dyshuari ka pësuar djegje, jemi në kërkim të provave dhe dëshmive të reja për t’i mbledhur ato”- tha Uka për KALLXO.com. 

    Tutje ai shtoi se ndonëse ka përkeqësim të motit për shkak te mjegullës, ekipi i hetuesisë është duke bërë kërkime për të gjetur dhe identifikuar të dyshuarin që kreu aktin.

     

  • Detaje nga Policia: Përveç nxënësve, qeni sulmoi edhe disa policë – arrestohet pronari

    Disa nxënës dhe disa zyrtarë policorë kanë marrë lëndime, pasi janë sulmuar nga një qen i cili kishte hyrë brenda objektit të shkollës “17 shkurti” në Shirokë të Suharekës.

    Policia ka dhënë detaje për ngjarjen duke njoftuar se rasti është raportuar, më 22.01.2025, rreth orës 09:50 minuta.

    Dy nxënës kanë marrë lëndime nga sulmi i qenit dhe janë duke marrë trajtim në Spitalin Rajonal të Prizrenit. Një nxënëse e lindur në vitin 2017 ka lëndime më serioze në kokë nga kafshimi i qenit – thekson Policia për KALLXO.com.

    Ndërkaq, sipas PK-së, dy nxënës kanë marrë lëndime të lehta gjatë ikjes.

    “Patrullat policore i janë përgjigjur rastit me urgjencë. Kur kanë arritur në shkollë kanë vërejtur një qen brenda shkollës, i cili kishte sulmuar nxënësit e shkollës dhe paraqiste rrezik potencial ende. Qeni ka sulmuar edhe policët, mirëpo në shpejtësi është asgjësuar – duke e mënjanuar rrezikun e mëtutjeshëm.” – ka thënë për KALLXO.com, zëdhënësi i Policisë në Prizren, Vesel Gashi.

    Tutje, ai njoftoi se Policia ka ndihmuar nxënësit të dërgohen në urgjencë për mjekim e ka siguruar vendin e ngjarjes dhe ka ndërmarrë të gjitha veprimet ligjore, në lidhje me rastin në fjalë.

    Për ngjarjen është njoftuar Prokurori kompetent, Hetimet Rajonale në Prizren, IPK-ja si dhe është identifikuar pronari i qenit dhe i njëjti është arrestuar.

    Rasti është iniciuar, si: “shkaktim i rrezikut të përgjithshëm”.

    Policia shton se Njësitet përkatëse policore janë duke hetuar rastin.

  • Qeni hyn brenda një shkolle në Suharekë, sulmon një nxënës

    Një nxënës ka marrë lëndime trupore, pasi është sulmuar nga një qen.

    KALLXO.com mëson se në një Shkollë fillore në Shirokë të Suharekës, më 22.01.2025, një qen ka hyrë brenda objektit të shkollës dhe në korridor ka sulmuar një nxënës.

    Në lidhje me këtë rast KALLXO.com ka kontaktuar edhe me Policinë e Kosovës.

    Vesel Gashi, zëdhënës i Policisë për rajonin e Prizrenit, i ka thënë KALLXO.com se nxënësi i lënduar tashmë është dërguar në Spital për trajtim mjekësor.

    “Policia ka intervenuar menjëherë pas marrjes së informatës dhe ka neutralizuar qenin.” – tha Gashi për KALLXO.com.

    Tutje, ai shtoi se rasti po vazhdon të trajtohet edhe më tutje.