Pjesëtarë të Forcës së Sigurisë së Kosovës, konkretisht të Regjimentit të Dytë të Forcave Tokësore, kanë përfunduar me sukses ushtrimin fushor “Shqiponja 1”.
Ky ushtrim u realizua në kuadër të ngritjes së kapaciteteve operacionale – njofton Ushtria e Kosovës.
“Në kuadër të ngritjes dhe forcimit të kapaciteteve operacionale të Forcës së Sigurisë së Kosovës (FSK), Kompania B e Regjimentit të Dytë të Forcave Tokësore ka realizuar me sukses ushtrimin fushor ‘Shqiponja 1’.” – thuhet në njoftim të FSK-së.
Ky ushtrim sipas Forcës së Sigurisë ka pasur për qëllim vlerësimin dhe testimin e aftësive, me synimin që të sigurohet gatishmëria e lartë për përmbushjen e detyrave të planifikuara dhe arritjen e objektivave për vitin 2025.
“Përmes skenarëve të ndryshëm taktikë, pjesëtarët e FSK-së kanë demonstruar aftësi të avancuara në menaxhimin e situatave sfiduese – duke dëshmuar profesionalizëm dhe përkushtim në realizimin e misionit të tyre.” – u tha mes të tjerash në njoftim.
Forca e Sigurisë së Kosovës (FSK) u formua më 21.01.2009, gati një vit pas shpalljes së pavarësisë së Kosovës, më 17.02.2008.
Ndërkaq, më 14.12.2018, Kuvendii Kosovës me votimin e tri Ligjeve ia zgjeroi mandatin dhe kompetencat për t’u shndërruar në Ushtri – në një proces që pritet të zgjasë deri në 10 vjet.